काठमाडाैँ । काठमाडौँ महानगरपालिकाले सबै सहकारी संस्थालाई गैरनेपाली नागरिकसँग आर्थिक कारोबार नगर्न आग्रह गरेको छ।
कामपा सहकारी विभागका प्रमुख धुव्रकुमार काफ्लेका अनुसार, गैरनेपाली नागरिकलाई सदस्य बनाउनु सहकारी ऐन, २०७४ विपरीत रहेको छ। सहकारी ऐनको दफा ३० र काठमाडौँ महानगरपालिकाको सहकारी ऐनको दफा २० अनुसार, सहकारीमा नेपाली नागरिक मात्र सदस्य हुन सक्ने प्रष्ट व्यवस्था छ। त्यसैगरी, दफा ५० र दफा ३९ अनुसार सहकारीहरूले सदस्य केन्द्रित बचत तथा ऋण कारोबार सञ्चालन गर्नुपर्नेछ।
काफ्लेले जानकारी दिनुभयो कि लामो समयदेखि साधारणसभा प्रतिवेदन नबुझाएका सहकारीलाई खारेजी प्रक्रियामा नलगाइने छ। प्रतिवेदन पेश नभएका सहकारीलाई खारेजीमा लैजाँदा बचतकर्ताको रकम हिनामिना हुने भएकाले, पहिले प्रतिवेदन बुझाउने र त्यसपछि मात्र खारेजी प्रक्रिया अघि बढाउने निर्णय गरिएको छ।
खारेजी प्रक्रियामा आउने कुनै पनि सहकारीमा, सबैभन्दा पहिले बचतकर्ताको रकम र आर्थिक कारोबारको यकिन गरिनुपर्ने छ। कामपाले दुई महिनाअघि नै सूचनामार्फत तोकिएको समयमा प्रतिवेदन नपेस गर्ने र साधारणसभा नगर्ने सहकारीलाई निष्क्रिय घोषणा गरी कानुनी कारबाही गरिने चेतावनी दिइसकेको छ। हाल काठमाडौँमा करिब १,९०० सहकारी दर्ता छन्, जसमा अधिकांश बचत तथा ऋण सहकारी रहेको जानकारी कामपाले दिएको छ।
