काठमाडौं । बालेन्द्र शाहले प्रतिनिधि सभा सदस्य निर्वाचनका क्रममा गरेको खर्च विवरण सार्वजनिक गरेका छन्। प्रतिनिधि सभा सदस्य निर्वाचन ऐन, २०७४ को दफा ७२ तथा निर्वाचन आचारसंहिता अनुसार उनले आफ्नो निर्वाचन खर्चको विवरण निर्वाचन आयोगमा पेश गरेका हुन्।
जिल्ला निर्वाचन कार्यालयमार्फत बुझाइएको विवरण अनुसार उनले प्रतिनिधि सभा सदस्य पदका लागि भएको निर्वाचनमा कुल १४ लाख १७ हजार २८९ रुपैयाँ खर्च गरेको उल्लेख गरेका छन्।
खर्च विवरणमा दुई वटा सवारी साधन १५ दिन प्रयोग गर्दा इन्धनसहित २ लाख ९३ हजार ८ सय रुपैयाँ खर्च भएको उल्लेख छ। त्यस्तै पाँच पटक हवाई यात्रा गर्दा २५ हजार रुपैयाँ खर्च गरिएको विवरणमा जनाइएको छ।
मतदाता प्रशिक्षण कार्यक्रमका क्रममा ५८ जनाका लागि खाजामा २८ हजार ९७० रुपैयाँ खर्च गरिएको छ। १५ दिनसम्म सञ्चालन गरिएको घरदैलो अभियान अन्तर्गत वडा स्तरीय प्रचार कार्यक्रमका लागि ५ लाख ८० हजार रुपैयाँ खर्च भएको विवरणमा उल्लेख गरिएको छ।
त्यसैगरी नमुना मतपत्र छपाइका लागि ४९ हजार ८५० रुपैयाँ खर्च गरिएको छ। झापा–५ क्षेत्रीय निर्वाचन कार्यालय सञ्चालनका लागि दुई महिनासम्म पानी खर्चमा १ लाख २० हजार रुपैयाँ र स्टेशनरी खर्चमा २२ हजार ८२० रुपैयाँ खर्च गरिएको विवरणमा जनाइएको छ।
प्रचार–प्रसार सामग्रीतर्फ झण्डा र व्याज छपाइमा १ लाख ५७ हजार ४१ रुपैयाँ तथा ब्यानर र स्टिकर छपाइमा १ लाख १९ हजार ८०८ रुपैयाँ खर्च भएको उल्लेख गरिएको छ। साथै मनोनयन दर्ता शुल्कका रूपमा १० हजार रुपैयाँ खर्च भएको विवरणमा समेटिएको छ।
उक्त खर्च विवरण उम्मेदवारका निर्वाचन प्रतिनिधि नविन भण्डारीमार्फत २०८२ फागुन २५ गते जिल्ला निर्वाचन कार्यालयमा बुझाइएको जनाइएको छ।
