काठमाडौँ । देश निर्वाचनको माहोलमा छ र अबका केही घन्टामा मतदान पनि सुरु हुन्छ । अब मतदानका प्रक्रियागत बाहेकका अरु सबै काम पूरा भएको अवस्था पनि छ ।
आजै प्रधानमन्त्रीले राष्ट्रिय सुरक्षा परिषदको बैठक सम्पन्न गरेकी छिन् भने गृह मन्त्रालयको समन्वयमा सबै जिल्लाका प्रमुख जिल्ला अधिकारीहरुको भर्चुअल बैठक पनि आज बिहान नै सम्पन्न भएको छ ।
सुरक्षा परिषदमा अधिकारीहरुका साथै गृहको बैठकमा प्रमुख जिल्ला अधिकारीहरु कसैले पनि सुरक्षा लगायत अर्को कुनै चुनौती अथवा समस्या नदेखेको रिपोर्टिङ गरेका छन् । यसरी हेर्दा निर्वाचन शान्तिपूर्ण नै हुने देखिन्छ र सबै प्रक्रिया पूर्ण रुपमा पूरा भएको अवस्था पनि छ ।
उता यसै मेसोमा आज बिहान कार्यबाहक प्रमुख निर्वाचन आयुक्त रामप्रसाद भण्डारीले भने शान्तिपूर्ण निर्वाचन र निर्वाचनको सफलताको कामना गर्दै पशुपतिनाथमा विशेष पूजा गरेका छन् । उनी आज बिहान पशुपतिनाथमा विशेष पूजाअर्चना गर्न पुगेका पशुपति क्षेत्र विकास कोषका एकजना कर्मचारीले जानकारी दिए ।
उनले बिहान पशुपतिनाथमा पुगेर पूजा गरेका र मध्यान्ह ११ बजेतिर निर्वाचन आयोगमा आई निर्वाचन आयुक्तहरु र निर्वाचन आयोगका सचिवलाई चन्दन लगाइदिएका थिए ।
आयोगका एकजना उच्च कर्मचारी न्यूजपोलारसंग भन्नुभयो – प्रमुख निर्वाचन आयुक्तजीले आज पशुपतिनाथमा गएर निर्वाचनको सफलताको कामना गरेर विशेष पूजा अर्चना गर्नुभएको छ, त्यसपछि दिउँसो आयोगका पदाधिकारी, अधिकारीहरुलाई चन्दन लगाइदिनुभएको थियो । त्यस बखत उहाँले आफूले निर्वाचनको सफलताको कामना गर्दै बिहान पशुपतिनाथमा विशेष पूजा गरेको बताउनुभएको थियो ।
यसैबीच आजै निर्वाचन आयोगले सोल्टी होटलमा रात्रिभोजको पनि आयोजना गरेको छ । आयोगले अन्तर्राष्ट्रिय पर्यवेक्षक र विदेशी कूटनीतिक नियोगका कर्मचारीलाई ब्रिफिङ कार्यक्रम समेत राखेको छ ।
