काठमाडाैँ । चितवन राष्ट्रिय निकुञ्ज भित्र घाँसे मैदान व्यवस्थापनका लागि नियन्त्रित डढेलो लगाउन सुरु गरिएको छ । वर्षायाममा अत्यधिक बढ्ने ढड्डी घाँस तथा अतिक्रमित झार नियन्त्रण गरी घाँसे मैदानलाई व्यवस्थित राख्न हरेक वर्षजस्तै यस वर्ष पनि डढेलो लगाउने कार्य थालिएको हो ।
निकुञ्जका सूचना अधिकारी अविनाश थापा मगरका अनुसार हाल भिम्ले, सुखिभार र कसरा क्षेत्रमा नियन्त्रित डढेलो लगाउने काम सुरु भइसकेको छ । ती क्षेत्रको काम सम्पन्न भएपछि क्रमशः अन्य भागमा पनि डढेलो लगाइनेछ ।
उक्त कार्यका लागि निकुञ्जका ३० जना कर्मचारी परिचालन गरिएको जनाइएको छ । सूचना अधिकारी मगरका अनुसार नियन्त्रित रूपमा डढेलो लगाएपछि अनियन्त्रित तथा ठूलो डढेलोको जोखिम कम हुने गर्दछ । यस विधिबाट वन तथा वन्यजन्तुमा न्यून असर पर्ने र घाँसे मैदान व्यवस्थापनमा उल्लेखनीय सहयोग पुग्ने निकुञ्जको भनाइ छ ।
घाँसे मैदानलाई खण्ड–खण्डमा विभाजन गरी डढेलो लगाइने छ । सम्पूर्ण क्षेत्रमा नियन्त्रित डढेलो सम्पन्न गर्न करिब एक महिना लाग्ने निकुञ्ज प्रशासनले जनाएको छ ।
