काठमाडाैँ । अन्तरिम सरकारकी प्रधानमन्त्री सुशीला कार्कीले निर्वाचनको पूर्वसन्ध्यामा परेको फागु पूर्णिमा (होली) ले देशभर नयाँ उत्साह र सकारात्मक ऊर्जा फैलाउने विश्वास व्यक्त गरेकी छन्।
सोमवार देशवासीको नाममा सम्बोधन गर्दै उनले होली पर्वले नेपाली समाजमा एकता, सद्भाव र आपसी विश्वास सुदृढ बनाउने बताइन्। स्वदेश तथा विदेशमा रहेका सम्पूर्ण नेपालीहरूमा शुभकामना व्यक्त गर्दै प्रधानमन्त्री कार्कीले रङ्गहरूको यस पर्वले नेपालको विविधतालाई अझ मजबुत बनाउँदै सामाजिक समरसताको सन्देश प्रवाह गर्ने धारणा राखिन्।
सम्बोधनका क्रममा उनले आफ्नो कार्यकाल र जिम्मेवारीको समीक्षा पनि गरिन्। इतिहासकै कठिन मोडमा देशको नेतृत्व सम्हाल्ने अवसरलाई मातृभूमिप्रतिको दायित्वका रूपमा लिएको उल्लेख गर्दै उहाँले आफ्नो कार्यकालभर न्याय, निष्ठा र पारदर्शिताको पक्षमा उभिएर काम गर्ने प्रयास गरेको स्मरण गरिन्।
उनले अब केही दिनमै देशको बागडोर जनताले निर्वाचित गर्ने नयाँ प्रतिनिधिहरूको हातमा जाने उल्लेख गर्दै निर्वाचनलाई शान्तिपूर्ण, स्वच्छ र ऐतिहासिक बनाउन सबैलाई आग्रह गरिन्। होली मनाउँदा संयमता अपनाउन र कसैको इच्छाविपरीत रङ नलगाउन पनि उनले अपिल गरिन्।
प्रधानमन्त्री कार्कीले अन्तरिम सरकार आफ्नो मुख्य दायित्व अर्थात् निर्वाचन सम्पन्न गराउने जिम्मेवारी पूरा गरेर सत्ता हस्तान्तरण गर्न पूर्ण रूपमा तयार रहेको स्पष्ट पारिन्।
