मेलबोर्नः अस्ट्रेलियाको मेलबोर्नमा जारी तेस्रो टेस्ट क्रिकेटमा अस्ट्रेलियासामु इङल्यान्डको लज्जास्पद पराजय भएको छ ।
मेलबोर्न क्रिकेट मैदानमा सम्पन्न खेलमा इङल्यान्ड तेस्रो दिनको पहिलो सत्रमै अलआउट भएपछि अस्ट्रेलियाले सहजै एक इनिङ र १४ रनले खेल जितेको हो ।
इङल्यान्डको दोस्रो पारि ६८ रनमै समेटिएको थियो । दोस्रो दिन ४ विकेट गुमाएर ३१ रन बनाएको इङल्यान्डले तेस्रो दिन ६ विकेटको क्षतिमा ३७ रन बनाएर सबै विकेट गुमाएको थियो ।
इङल्यान्डका लागि कप्तान जो रुटले सर्वाधिक २८ रन बनाएका थिए । इङल्यान्डको पारि ध्वस्त बनाउनेक्रममा अस्ट्रेलियाली बलर स्कट बोलान्डले ६ विकेट लिएका थिए भने मिचेल स्टार्कले ३ तथा क्यामरुन ग्रीनले १ विकेट लिएका थिए ।
यो जितसँगै पाँच म्याचको यस शृंखलामा लगातार तीन खेल जितेर अस्ट्रेलियाले कब्जा जमाएको छ ।
यसअघि दोस्रो दिनको खेल समाप्त हुँदा दोस्रो इनिङमा इङल्यान्डले चार विकेट गुमाएर ३१ रन मात्र बनाएको थियो ।
टस हारेर पहिले ब्याटिङको निम्तो पाएको इङल्यान्डको पहिलो पारी १८५ रनमै समेटिएको थियो । पहिलो दिन ६५.१ ओभरमै इङल्यान्डको पारी समाप्त भएको थियो । इङल्यान्डका लागि कप्तान जो रुटले सर्वाधिक ५० रन बनाएका थिए ।
पहिलो दिन नै पारि शुरु गरेको अस्ट्रेलियाले पनि खासै उल्लेखनीय खेल प्रदर्शन गर्न सकेको थिएन । तैपनि अस्ट्रेलियाले सबै विकेट गुमाएर २६७ रन बनाएर ८२ रनको अग्रता लिएको थियो ।
अस्ट्रेलियाका ओपनर मार्कस ह्यारिसले सर्वाधिक ७६ रन बनाएका थिए । इङल्यान्डका बलरहरु जेम्स एन्डरसनले ४, ओल्ली रबिनसन र मार्क उडले समान दुई दुई तथा बेन स्टोक र ज्याक लिचले समान एकएक विकेट लिएका थिए ।
दोस्रो दिन दोस्रो इनिङ थालेको इङल्यान्डका लागि सुखद शुरुवात भएन । हासिब हमिद ७, ज्याक क्रलीले ५ र डाविड मलान एवं ज्याक लिच बिना रन बनाई आउट भएका थिए ।
खेल संक्षेप
अस्ट्रेलिया — २६७ रन (अल आउट)
इङल्यान्ड — १८५ रन (पहिलाे इनिङ), ६८ रन (दाेस्राे इनिङ)
अस्ट्रेलिया एक इनिङ र १४ रनले विजयी
यसअघि एडिलेडमा भएको पहिलो टेस्ट खेलमा अस्ट्रेलिया २७५ रनले विजयी भएको थियो भने ब्रिस्बेनमा भएको दोस्रो टेस्टमा पनि अस्ट्रेलिया ९ विकेटले विजयी भएको थियो ।
एसेज शृंखलामा दुई टिमबीच पाँच वटा टेस्ट खेल हुँदैछन् ।
