काठमाडाैँ । सशस्त्र प्रहरी बल, नेपाल र भारतीय सशस्त्र सीमा सुरक्षा बल (एसएसबी) बिच बाहिनीस्तर (डिआइजी तह) को समकक्षी समन्वयात्मक बैठक भारतको उत्तराखण्ड राज्यस्थित चम्पावतमा सम्पन्न भएको छ।
बिहीबार सम्पन्न उक्त बैठकमा आसन्न प्रतिनिधिसभा सदस्य निर्वाचनलाई लक्षित गर्दै सीमा क्षेत्रमा हुनसक्ने अवैध घुसपैठ, चोरी–निकासी, लागुऔषध ओसारपसार तथा अन्य गैरकानुनी गतिविधि नियन्त्रणका विषयमा विस्तृत छलफल भएको सशस्त्र प्रहरी बलले जनाएको छ। निर्वाचनका समयमा हुनसक्ने निर्वाचनविरोधी गतिविधि रोकथाम, अवैध आवतजावत नियन्त्रण तथा मौन अवधिमा सीमानाका बन्द गर्दा यसको प्रभावकारिता कसरी बढाउने भन्ने विषयमा दुवै पक्षबीच सहमति जुटेको छ।
बैठकमा सीमा क्षेत्रमा हुने सम्भावित सुरक्षा चुनौतीलाई मध्यनजर गर्दै संयुक्त तथा समानान्तर सीमा गस्तीलाई थप प्रभावकारी बनाउने, सूचनाको नियमित आदानप्रदान गर्ने र अवैध गतिविधिमाथि सूक्ष्म निगरानी बढाउने विषयमा पनि छलफल भएको जनाइएको छ। तेस्रो देशका नागरिकको अनधिकृत प्रवेश, लागुऔषध तथा मानव बेचबिखन, जाली नोट कारोबार, हतियार र नगद तस्करीजस्ता अपराध नियन्त्रणका लागि निरन्तर र घनिष्ठ सहकार्य गर्ने निर्णयसमेत बैठकबाट भएको छ।
समन्वयात्मक बैठकमा सशस्त्र प्रहरी बल, नेपाल नं. ७ वैद्यनाथ बाहिनी मुख्यालय अत्तरियाका निमित्त बाहिनीपति सशस्त्र प्रहरी वरिष्ठ उपरीक्षक दिगविजय सुवेदीको नेतृत्वमा नेपाली प्रतिनिधिमण्डल सहभागी भएको थियो। भारतीय पक्षबाट सेक्टर हेडक्वार्टर अल्मोडा र पिलिभितका डिआइजीद्वय सुधान्सु नौटियाल र अनिलकुमार शर्मा लगायत सुदूरपश्चिम प्रदेशसँग सीमा जोडिएका क्षेत्रका भारतीय सशस्त्र सीमा बलका विभिन्न रेजिमेन्ट प्रमुखहरूको उपस्थिति रहेको थियो।
सशस्त्र प्रहरी बल, नेपाल र सशस्त्र सीमा बल, भारतबीच केन्द्रीय, प्रदेश तथा जिल्लास्तरमा नियमित रूपमा यस्ता समन्वयात्मक बैठक हुँदै आएका छन्। यस्ता बैठकले दुवै देशबीचको सीमा सुरक्षा व्यवस्थापनलाई थप सुदृढ बनाउँदै आएको बताइएको छ।
