लागोस। नाइजेरिया ले आफ्ना नागरिकहरूलाई विदेशमा युद्धमा सहभागी गराउने भन्दै रुस को सेनामा भर्ती गराइदिने नाममा हुने ठगीबाट सावधान रहन आग्रह गरेको छ। अन्य अफ्रिकी देशका नागरिकहरू पनि यस्तै प्रकारका ठगीको शिकार बनेका तथ्यहरू सार्वजनिक भएका छन्।
नाइजेरियाको विदेश मन्त्रालयले आइतबार जारी गरेको विज्ञप्तिमा ‘विदेशी सशस्त्र द्वन्द्वमा भाग लिन नाइजेरियाका नागरिकहरूलाई गैरकानूनी रूपमा भर्ती गरिनुका घटनाहरू बढ्दो र चिन्ताजनक देखिनु’ प्रति गम्भीर चिन्ता व्यक्त गरेको छ । विज्ञप्तिमा प्रत्यक्ष रूपमा रुसको नाम भने उल्लेख गरिएको छैन ।
अनुसन्धानकर्ता समूह ‘अल आइज अन वाग्नर’ ले सार्वजनिक गरेको रिपोर्ट अनुसार, कम्तीमा ३६ जना नाइजेरियाली नागरिकहरूलाई रुसको सेनामा भर्ती गरि युक्रेनमा पठाइएको थियो । उहाँहरूमध्ये ५ जनाको युद्धमा मृत्यु भएको थियो ।
विदेश मन्त्रालयका अधिकारीहरूले भनेका छन्, “धेरै नागरिकहरूलाई भ्रामक जानकारी दिइ सैनिक सेवा सम्झौता (कन्ट्र्याक्ट)मा हस्ताक्षर गर्न बाध्य पारेर युद्ध क्षेत्रमा पठाइएको छ । यसरी ठगीमा परेकाहरू असहज र खतरनाक परिस्थितिमा रहे ।”
गत हप्ता एएफपीले सङ्कलन गरेको विवरण अनुसार केही केनियाली नागरिकहरूलाई उच्च तलबको आश्वासन दिइ रुस पठाइयो । उहाँहरूले रुस पुगेपछि सिरिलिक भाषामा कागजातमा हस्ताक्षर गर्न बाध्य पारिएका र त्यसपछि अग्निपरीक्षण क्षेत्र वा युद्धका मोर्चामा पठाइएका थिए ।
दक्षिण अफ्रिकी राष्ट्रपति सिरिल रामाफोसा पनि गत हप्ता रुसका राष्ट्रपति भ्लादिमिर पुटिनसँग रुसको सेनामा लड्न पठाइएका दक्षिण अफ्रिकी नागरिकको सुरक्षित फिर्तीको विषयमा छलफल गर्नुभएको छ ।
उगाण्डामा पनि यस्ता घटनाका प्रमाणहरू देखिएका छन्, यद्यपि उगाण्डाले हालसम्म मस्कोको आलोचना गरेको छैन ।
नोभेम्बरमा युक्रेनले जनाएको छ कि कम्तीमा ३६ अफ्रिकी देशका एक हजार ४३६ नागरिकहरू रुसको पक्षमा युद्धमा संलग्न रहेका छन् । (रासस/एएफपी)
