बुटवल । रुपन्देही– ३ मा जनता समाजवादी पार्टी (जसपा) नेपालबाट उम्मेदवार बनेका श्रीनिवास यादवले उम्मेदवारी फिर्ता लिएका छन् ।
सोमबार प्रेस विज्ञप्ति जारी गर्दै यादवले पार्टी परित्यागको घोषणा गर्दै नेकपा एमालेमा समाहित भएको जानकारी दिएका हुन् ।
जसपा नेपालका केन्द्रीय सदस्य समेत रहेका यादवले पार्टीको साधारण सदस्यसहित सम्पूर्ण जिम्मेवारी परित्याग गरेको घोषणा गरेका छन् । उनले भनेका छन्, ‘आजका मितिदेखि जनता समाजवादी पार्टी (जसपा), नेपालको साधारण सदस्यसहित सम्पूर्ण जिम्मेवारी परित्याग गर्दै मेरो उम्मेदवारीसमेत फिर्ता लिँदै नेकपा (एमाले) मा समाहित भएको घोषणा गर्दछु ।’
यस्तै, यादवले वर्तमान विषम राष्ट्रिय परिस्थितिमा मुलुकको राजनीतिक स्थायित्व र निकासका लागि एमाले नै प्रमुख राजनीतिक शक्तिका रूपमा स्थापित हुने विश्वाससहित एमालेलाई रोजेको जनाएका छन् ।
