इङलिस प्रिमियर लिगमा यस सिजनको उपाधि दौडमा रहेको आर्सनललाई गएराति ठुलै धक्का लाग्यो ।
निकै तनावपूर्ण खेलमा आर्सनललाई ब्रेन्टफोर्डले १–१ को बराबरीमा राखेको थियो । उपाधि दौडमा यो बराबरीसँगै आर्सनल र दोस्रो स्थानमा रहेको म्यान्चेस्टर सिटीसँग ४ अंकको मात्र फरक छ ।
आर्सनल २६ खेलबाट ५७ अंक सहित पहिलो स्थानमा छ भने सिटीको समान खेलबाट ५३ अंक छ ।
ब्रेन्टफोर्डको गृह मैदान जीटेक कम्युनिटी स्टेडियममा पहिलो गोल भने आर्सनलका नोनी माडुकेले ६१औं मिनेटमा गरेका थिए । तर त्यसको १० मिनेट पछि ७१औं मिनेटमा ब्रेन्टफोर्डका कीन लेविस–पोटरले गोल फर्काए ।
निराश आर्सनलका तर्फबाट ब्रेन्टफोर्डमाथि निरन्तर दबाब राखे पनि ब्रेन्टफोर्डले आर्सनलको पोस्टमा ११ पटक धावा बोलेको थियो, जसमा तीन पटक निकै सुन्दर आक्रमण समावेश थिए ।
यो बराबरीसँगै आर्सनलको प्रिमियर लिग उपाधि जित्नेमा अन्यौल बढेको छ । आर्सनलले पछिल्ला पाँच खेलमा दुई वटामा जित निकाले पनि दुई वटा बराबरी र एकमा हार व्यहोरेको छ ।
अबका पाँच खेल पनि आर्सनलका लागि निकै कठिन छन् । आर्सनलले अब उल्भ्स, टोटेनह्याम, चेल्सी, ब्राइटन र एभर्टनसँग खेल्दैछ ।
उता, सिटीका लागि भने केही सहज हुनेछ । निकै राम्रो फर्ममा अघि बढेको पेप ग्वार्डिओलाको सिटीले अब फुलह्याम, न्यूक्यासल, लिड्स युनाइटेड, क्रिस्टल प्यालेस र नटिङघम फरेस्टसँग खेल्दैछ ।
