आइसिसि टी–२० विश्वकप क्रिकेट अन्तर्गत गएराति भएको खेलमा भारतले नामिबियालाई ९३ रनको विशाल अन्तरले पराजित गरेको छ ।
भारतको नयाँदिल्लीमा भएको साँझको खेलमा पहिले ब्याटिङ गर्दै भारतले जितका लागि नामिबियासामु २१० रनको विशाल चुनौती दिएको थियो ।
नामिबियाले टस जितेर पहिले भारतलाई ब्याटिङका लागि आमन्त्रण गरेको थियो । सूर्य कुमार यादवको कप्तानीमा रहेको भारतका लागि इसान किसन (६१ रन) र हार्दिक पान्ड्या (५२ रन) ले जितको आधार तयार गरेका थिए ।
यसबाहेक शिभम दुबेले २३, तिलक बर्माले २५, सन्जु साम्सनले २२ रन बनाउनु बाहेक अन्य खेलाडीले खासै योगदान गरेका थिएनन् ।
जितका लागि २१० रनको लक्ष पछ्याएको नामिबिया १८.२ ओभरमा ११६ रनमै समेटियो । भारतीय बलरका सामुन्ने नामिबियाली खेलाडीहरु टिक्न सकेनन् । टिमका लागि लाइरेन स्टेनक्याम्पले सर्वाधिक २९ र जान फ्राइलिन्कले २२ रन बनाएका थिए ।
भारतीय बलरहरु वरुन चक्रवर्तीले ३, अक्षर पटेल र हार्दिक पान्ड्याले दुई दुई, अर्सदिप सिंह, शिभम दुबे र जसप्रित बुमराहले एक एक विकेट लिए ।
यो जितसँगै भारतले लगातार दुई खेल जितेर चार अंक बटुलेको छ । समूह ए का भारत र पाकिस्तानले समान चार अंक बटुलेका छन् भने युएसए र नामिबिया जितविहीन रहँदै समूहमा अन्तिममा छन् । नेदरल्यान्ड्सले भने एक जितका कारण २ अंक पाएको छ ।
