आइसिसि टी–२० विश्वकप अन्तर्गत आज तीन खेल हुँदैछन् । खेल तालिका अनुसार आज नेपालले इटालीको सामना गर्नेछ ।
समूह सी मा रहेका नेपाल र इटाली दुबै पहिलो जितको खोजीमा रहने छन् । यो खेल मुम्बईको वान्खडे रंगशालामा अपराह्न ३.१५ बजे सुरु हुनेछ । नेपाल यसअघि पहिलो खेलमा इङल्यान्डसँग जितको नजिक पुगेर पनि ४ रनले पराजित भएको थियो ।
नेपाली खेलाडीको हौसला बढाउन ठूलो संख्यामा नेपाली खेलप्रेमी मुम्बई पुगिसकेका छन् । पहिलो खेलमा झै यसपटक पनि उनीहरु नेपाली झण्डा र नेपाली टिमको जर्सी लगाएर भेला हुँदैछन् ।
मुम्बई पुगेका एक नेपाली खेलप्रेमीका अनुसार मुम्बईमा यतिबेला नेपाली खेल समर्थकलाई स्थानीय जनताले निकै हार्दिकता पूर्वक स्वागत गरेका छन् ।
नेपाली टिमको प्रदर्शन र नेपाली दर्शकहरुको भारी उपस्थितिका कारण विश्वभर नै नेपालको चर्चा चुलिएको छ भने भारतीय मिडिया र खेल कमेन्टेटरले नेपाललाई उदीयमान र निरन्तर प्रगति पथमा अघि बढेको भन्दै मुक्तकण्ठले प्रशंसा गरेका छन् ।
पिचको अवस्था
वान्खडे रंगशालामा यसअघि भएका दुई खेलमा पहिले ब्याटिङ गर्ने टिमले १६१ र १८४ रन बनाएका थिए, र पहिले ब्याटिङ गर्ने टिम नै विजयी भएका थिए । तर बिहीबार साँझपख अलि गर्मी हुने सम्भावना रहेको छ । यस खेलमा ओसले खासै असर नगर्ने सम्भावना रहेको भारतीय मिडियाले बताएका छन् ।
नेपाली कप्तान रोहित पौडेलले इङल्यान्डसँगको खेलबाट नेपाली टिमले निकै राम्रो अनुभव हासिल गरेको बताउँदै अबका खेलहरुमा राम्रो नतिजा ल्याउने विश्वास व्यक्त गरेका छन् ।
नेपालको समूहमा नेपाल सहित इङल्यान्ड, वेस्ट इन्डिज, इटाली र स्कटल्यान्ड रहेका छन् ।
बिहीबारका अन्य खेल
श्रीलंका vs ओमान (११.१५ बजे)
भारत vs नामिबिया (७.१५ बजे)
