आक्रामक ब्याट्सम्यान जर्ज मुन्सीको ८४ रनको मद्दतले स्कटल्यान्डले क्यानडालाई ७३ रनको फराकिलो जित निकालेको छ ।
समूह सी मा रहेको स्कटल्यान्डले यो जितसँगै महत्वपूर्ण दुई अंक जोडेको छ । यसअघि उदघाटन खेलमा वेस्ट इन्डिजसँगको म्याच गुमाएपछि स्कटल्यान्ड आजको खेल जित्नै पर्ने दबाबमा थियो ।
नेपाल सहित स्कटल्यान्ड, इङल्यान्ड, क्यानडा र वेस्ट इन्डिज यही समूह सी मा रहेका छन् ।
आजको खेलमा क्यानडाले टस जितेर स्कटल्यान्डलाई पहिला ब्याटिङको निम्तो दिएको थियो । स्कटल्यान्डले निर्धारित २० ओभरमा जर्ज मुन्सीको ८४, ब्रान्डन म्याकमुलेनको अविजित ४१, मिसेल जोन्सको ३७, कप्तान रिची बेरिङटनको १५ तथा माइकल लिस्कको अविजित २२ रन मद्दतले २०७ रन बनाएको थियो ।
कोलकाताको इडेन गार्डेन्समा भएको यस प्रतिस्पर्धामा २०८ रनको विशाल लक्ष पछ्याएको क्यानडा १६.४ ओभरमा १३४ रनमै अल आउट भएको थियो । क्यानडाका लागि बेन मेनान्टीले सर्वाधिक ५२ रन बनाएका थिए ।
स्कटल्यान्डका लागि माइकल लिस्कले क्यानडाका ४ विकेट लिएका थिए । त्यस्तै मार्क वाटले २ तथा ब्राड कुरी, ब्राड ह्वील र ओलिभर डेभिडसनले एकएक विकेट लिए ।
आजै अपराह्न ३.१५ बजे जिम्बाबे र ओमान बिच कोलम्बोमा खेल हुँदैछ ।
