काठमाडौं । जनताको प्रत्यक्ष दैनिकीमा असर गर्ने तरकारी, मसला, फलफुल र दाल तथा गेडागुडीमा महंगी बढेको छ । गत वर्षको तुलनामा महंगी बढेको हो । समीक्षा महिनामा खाद्य तथा पेय पदार्थ समूहको मुद्रास्फीति ९.७६ प्रतिशत र गैर–खाद्य तथा सेवा समूहको मुद्रास्फीति ४.१० प्रतिशत रहेको नेपाल राष्ट्र बैंकले जनाएको छ । यस महिनामा खाद्य तथा पेय पदार्थ समूहअन्तर्गत तरकारी, मसला, फलफुल र दाल तथा गेडागुडी उपसमूहको मूल्य वृद्धि उच्च रहेको हो ।
नेपाल राष्ट्र बैंकले सार्वजनिक गरेको देशको आर्थिक स्थितिमा मंसिरसम्म मूल्यवृद्धि ६.५५ प्रतिशत भएको छ । यो वार्षिक विन्दुगत उपभोक्ता मुद्रास्फीति हो । गत वर्षको मंसिरसम्म यस्तो मुद्रास्फीति ३.७१ प्रतिशत थियो । गत महिनाको तुलनामा पनि मंसिर महिनामा मूल्यवृद्धि बढेको हो । कात्तिकमा यस्तो मुद्रास्फीति ५.७६ प्रतिशत थियो । एक महिनामा मूल्यवृद्धि ०.७९ प्रतिशतले बढेको छ । गैर–खाद्य तथा सेवा समूहअन्तर्गत शिक्षा, लुगा तथा जुत्ता र फर्निसिङ तथा घरायसी उपकरणहरू उपसमूहको मूल्य बढेको छ ।
राष्ट्र बैंकको तथ्यांक अनुसार काठमाडौं उपत्यकामा सबैभन्दा बढी महंगी छ । काठमाडौं उपत्यकामा ७.६० प्रतिशत, तराईमा ६.६६ प्रतिशत, पहाडमा ५.२७ प्रतिशत र हिमालमा ४.८३ प्रतिशत मूल्यवृद्धि रहेको छ । गत वर्षको सोही अवधिमा काठमाडौं उपत्यकामा ३.६८ प्रतिशत, तराईमा ३.६५ प्रतिशत, पहाडमा ३.८४ प्रतिशत र हिमालमा ४.०५ प्रतिशत मूल्यवृद्धि थियो ।
समीक्षा महिनामा नेपालको वार्षिक विन्दुगत उपभोक्ता मुद्रास्फीति ६.५५ प्रतिशत रहेकोमा भारतमा (डिसेम्बर महिनाको) मुद्रास्फीति ७.३५ प्रतिशत रहेको छ । अघिल्लो वर्षको सोही महिनामा नेपाल र भारतको मुद्रास्फीति क्रमशः ३.७१ प्रतिशत र २.११ प्रतिशत थियो । सौर्य दैनिकबाट
