काठमाडौं । काठमाडौंको काभ्रेस्थली जंगलबाट पुर्व सैनिक सुबेदार बच्चुराम गुरुङ लुटिएका छन् । ‘बल्ने ढुंगा’ किन्ने भन्दै ५० लाख रुपैयाँ बोकेर काभ्रेस्थली जंगल पुगेका गुरुङ लुटिएका हुन् । साथीहरुको लहैलहैमा लागेर शुक्रबार (९ माघमा) ‘बल्ने ढुंगा’ किन्न काभ्रेस्थली पुगेका गुरुङलाई साथिहरुले ‘बल्ने ढुंगा बेच्ने मान्छे भेटेका छौं, मिलेर त्यो किनौं पछि करोडौंमा विक्री हुन्छ’ भनेपछि उनी ५० लाख रुपैयाँ सहित काभ्रेस्थली जंगल पुगेका थिए तर उनलाई ति लुटेराको समुहले लुटे ।
आफू लुटिएको सूचना उनले महानगरीय अपराध महाशाखा काठमाडौंमा दिएपछि अहिले लुटपाटमा संलग्न ६ जनालाई पक्राउ गरिएको महानगरीय अपराध महाशाखाका प्रमुख (एसएसपी) सहकुलबहादुर थापाले जानकारी दिए ।
तर यता गुरुङले भने जग्गा बैना गर्न बोलाएर आफूलाई सो समूहले लुटेको प्रहरीलाई बताएका छन् । उनी जग्गा प्लटिङको पनि काम गर्थे । लुटपाटमा संलग्न ६ जना पनि जग्गा प्लटिङ ब्यवसायमा संलग्न रहेको प्रहरीको प्रारम्भिक अनुसन्धानबाट खुलेको छ ।
