काठमाडौँ। डिजिटल युगमा पत्रकारिता, मिथ्या सूचना र तथ्य जाँचसम्बन्धी तीनवटा पुस्तक सार्वजनिक गरिएको छ ।
सेन्टर फर मिडिया रिसर्च नेपाल र जर्नलिजम एकेडेमीद्वारा आज यहाँ आयोजित कार्यक्रममा डिजिटल युगमा पत्रकारिता, मिथ्या सूचना र तथ्य जाँचका साथै डिजिटल परिदृश्य पुस्तक विमोचन गरिएको हो ।
डिजिटल युगमा पत्रकारिता पुस्तक जर्मनीका पत्रकारहरू स्टेफान मोल र तन्जिभ शुल्जले लेख्नुभएको हो । जर्मन भाषामा लेखिएको सो पुस्तकलाई लक्ष्मण श्रेष्ठ, तिलक पाठक र उज्ज्वल आचार्यले नेपाली भाषामा अनुवाद एवं सम्पादन गर्नुभएको छ ।
पुस्तकमा डिजिटलाइजेसनको युगमा मिडिया र पत्रकारिता, पत्रकारिताका शैली, सम्पादकीय व्यवस्थापन, सम्पादकीय जिम्मेवारी, पत्रकारिताको गुणस्तर लगायतका पक्षमा बहुआयामिक ढङ्गले चर्चा गरिएको छ ।
उज्ज्वल आचार्य र उमेश श्रेष्ठले लेख्नुभएको मिथ्या सूचना र तथ्य जाँचसम्बन्धी पुस्तकमा मिथ्या सूचना, मिथ्या सूचनाको प्रतिकार, तथ्य जाँच प्रक्रिया, मिडिया साक्षरतालगायतका विषय समावेश गरिएको छ । रासस
