काठमाडौं । नेपाली कम्युनिस्ट पार्टीका सहसंयोजक माधव नेपालविरुद्ध निर्वाचन आयोगमा उजुरी दर्ता भएको छ।
रौतहट–१ बाट उम्मेदवारी दर्ता गरेका नेपालविरुद्ध सोही क्षेत्रका उम्मेदवार राम नरेश राय यादवले उम्मेदवारी खारेजीको माग गर्दै उजुरी दिएका हुन्। उजुरीमा पतञ्जलि जग्गा प्रकरणमा मुछिएका कारण नेपाल उम्मेदवार बन्न अयोग्य रहेको दाबी गरिएको छ।
उजुरीमा अख्तियार दुरुपयोग अनुसन्धान आयोग ऐन, २०४८ को दफा १७ तथा भ्रष्टाचार निवारण ऐन, २०५९ को दफा ३३ अनुसार नेपाल निलम्बनमा रहेको र मुद्दा विचाराधीन अवस्थामा रहेको उल्लेख छ।
सोही आधारमा प्रतिनिधि सभा सदस्य निर्वाचन ऐन, २०७४ र अख्तियार दुरुपयोग अनुसन्धान आयोग ऐन, २०४८ को दफा १७ बमोजिम उहाँ उम्मेदवार हुन अयोग्य भएकाले उम्मेदवारी खारेज गर्न माग गरिएको छ।
निर्वाचन आयोगले उजुरीमाथि आवश्यक प्रक्रिया अनुसार छानबिन गरी निर्णय गर्ने जनाएको छ।
