काठमाडौं । मेडिकल व्यवसायी तथा नागरिक बचाउ महाअभियानका संयोजक दुर्गा प्रसाईं पक्राउ परेका छन्। उनलाई पोखराबाट पक्राउ गरिएको हो।
निर्वाचन आयोगको पत्राचारपछि प्रहरीको टोलीले प्रसाईंलाई नियन्त्रणमा लिएको हो। आयोगले प्रसाईंमाथि अनुसन्धान गर्न प्रहरीको साइबर ब्यूरो र जिल्ला प्रहरी परिसर काठमाडौंलाई पत्राचार गरेको थियो।
प्रसाईंले केही समयअघि सार्वजनिक गरेको एक भिडियोमा कांग्रेसको विशेष महाधिवेशन पक्षले निर्वाचन आयोगलाई ५२ करोड रुपैयाँ बुझाएर नतिजा आफ्नो पक्षमा पारेको आरोप लगाएका थिए। उक्त अभिव्यक्तिपछि आयोगले त्यस विषयमा अनुसन्धान आवश्यक ठहर गर्दै प्रहरीका दुई युनिटलाई पत्राचार गरेको जनाएको छ।
निर्वाचन आयोगले प्रसाईंमाथि निर्वाचन कसुरसम्बन्धी ऐन तथा मुलुकी फौजदारी संहिताअन्तर्गतको कसुरमा कारबाही हुनुपर्ने माग समेत अघि सारेको छ।
प्रहरीले घटनाबारे थप अनुसन्धान भइरहेको जनाएको छ।
