काठमाडौँ । प्रभु बैंक लिमिटेडको २४औं वार्षिक साधारण सभा सफलतापूर्वक सम्पन्न भएको छ। बबरमहलस्थित बैंकको प्रधान कार्यालयमा सम्पन्न सभाले विभिन्न महत्वपूर्ण निर्णयहरू पारित गर्दै विधिवत् रूपमा सभा सम्पन्न गरेको हो।
बैंकका सञ्चालक समिति अध्यक्ष किशोरजङ्ग कार्कीको अध्यक्षतामा सम्पन्न उक्त साधारण सभाले सञ्चालक समितिको वार्षिक प्रतिवेदनसहित आर्थिक वर्ष २०८१/०८२ को वासलात, नाफा–नोक्सान हिसाब, नगद प्रवाह विवरणलगायत सम्बन्धित सबै अनुसूचीहरू पारित गरेको छ।
त्यसैगरी, बैंकको सहायक कम्पनी प्रभु क्यापिटल लिमिटेड तथा प्रभु स्टक मार्केट लिमिटेडको आर्थिक वर्ष २०८१/०८२ को एकीकृत वित्तीय विवरणसमेत सभाबाट अनुमोदन गरिएको छ। साधारण सभामा छलफलका लागि प्रस्तुत सम्पूर्ण प्रस्तावहरू सर्वसम्मत रूपमा पारित भएका छन्।
हाल प्रभु बैंकले देशभर ३१२ वटा शाखा कार्यालय, ६८ वटा एक्स्टेन्सन काउण्टर र २६९ वटा एटिएममार्फत बैंकिङ सेवा प्रदान गर्दै आएको छ। विस्तारित बैंकिङ सञ्जालमार्फत बैंकले ३७ लाखभन्दा बढी ग्राहकलाई अत्याधुनिक प्रविधिसहितको गुणस्तरीय बैंकिङ सेवा प्रवाह गरिरहेको जनाएको छ।
