काठमाडौँ । नेपाली कांग्रेसको संस्थापन समूहले दुई महामन्त्री र एक सहमहामन्त्रीलाई पाँच वर्षका लागि पार्टीबाट निष्कासन गर्ने निर्णय गरेसँगै पार्टी औपचारिक रूपमा विभाजनतिर उन्मुख भएको छ।
बुधबार पार्टी केन्द्रीय कार्यालय सानेपामा बसेको संस्थापन पक्षको केन्द्रीय समिति बैठकले महामन्त्रीद्वय गगनकुमार थापा र विश्वप्रकाश शर्मासहित सहमहामन्त्री फर्मुलाहा मनसुरलाई साधारण सदस्यसमेत नरहने गरी पाँच वर्षका लागि पार्टीबाट निष्कासन गर्ने घोषणा गरेको हो।
पार्टी निर्णयविपरीत विशेष महाधिवेशन आह्वान गरेको आरोप लगाउँदै गरिएको उक्त कारबाहीपछि कांग्रेसभित्रको विवाद निर्णायक मोडमा पुगेको छ। संस्थापन समूहको निर्णयसँगै विशेष महाधिवेशन पक्षधर नेताहरूले भृकुटीमण्डपबाट नयाँ नेतृत्व चयनको तयारी थालेका छन्।
