वासिङ्टन । पृथ्वीका सबैभन्दा धनी अर्बपति एलन मस्कले आफ्नो स्टारलिङ्क इन्टरनेट स्याटेलाइटले अन्तरिक्षमा धेरै ठाउँ लिएको भन्ने आलोचनालाई खारेज गरेका छन्। उनले पृथ्वीको तल्लो कक्षामा अर्बौं उपग्रह स्थापना गर्न सकिने बताए । यसअघि युरोपेली अन्तरिक्ष एजेन्सी र चीनले एलन मस्कको महत्वाकांक्षी परियोजनालाई निशाना बनाएका थिए । भर्खरै मस्कको उपग्रह अन्तरिक्षमा रहेको चिनियाँ स्पेस स्टेसनमा ठोकिनबाट जोगिएको थियो ।
मस्कले एक अन्तर्वार्तामा भने, “अन्तरिक्ष धेरै ठूलो छ र उपग्रह धेरै सानो छ।” स्पेसएक्सका मालिक मस्कले आफ्नो स्टारलिङ्क इन्टरनेट सेवामार्फत आफ्ना प्रतिस्पर्धीहरूलाई स्याटेलाइट उद्योगमा प्रवेश गर्न अवरोध गरिरहेको भन्ने भनाइलाई अस्वीकार गरेका छन् । “हजारौँ उपग्रह केही होइनन्। यो पृथ्वीमा लाखौँ कारहरू जस्तै हो। यो केही होइन”, मस्कले भने, “हामीले कसैलाई अन्तरिक्षमा आउन रोकेका छैनौँ ।”
स्याटेलाइटसँग ठोक्किनबाट बच्न मार्ग परिवर्तन
यसअघि युरोपेली अन्तरिक्ष एजेन्सीले पनि मस्कले तीव्र गतिमा बढिरहेको व्यावसायिक अन्तरिक्ष उद्योगमा आफ्नै नियम बनाएको बताएको थियो । यसअघि चीनले मस्कको स्याटेलाइटसँगको टक्करबाट बच्न आफ्नो अन्तरिक्ष स्टेशनलाई डाइभर्ट गर्नुपरेको गुनासो गरेको थियो । चीनले संयुक्त राष्ट्रसङ्घमा केही कागजातहरू प्रस्तुत गर्दै यी सम्भावित टक्करहरूका बारेमा जानकारी दिएको छ। कागजातमा चीनले उसको अन्तरिक्ष स्टेशनले मस्कको स्टारलिङ्क प्रोग्रामसँग दुई पटक ठोक्किनबाट बालबाल बचेको गुनासो गरेको छ । पहिलो पटक जुलाई १ मा र दोस्रो पटक अक्टोबर २१ मा यस्तो भएको थियो ।
यो रिपोर्ट बाहिर आएपछि चिनियाँ नागरिकहरु टेस्ला तथा स्पेसएक्सका मालिक मस्कसँग निकै आक्रोशित भएका छन् । धेरैले अनलाइन प्लेटफर्ममा मस्कलाई कडा निशाना बनाएका छन्। संयुक्त राष्ट्रसङ्घको बाह्य अन्तरिक्ष मामिलाको कार्यालयको वेबसाइटमा रहेको प्रतिवेदनमा चीनले यी टक्करहरू रोक्न चिनियाँ अन्तरिक्ष स्टेशनले आवश्यक कदम चाल्नुपरेको बताएको छ।
अमेरिकाको अन्तरिक्ष हतियार स्याटेलाइटका अनुसार चिनियाँ नागरिकले आफ्नो सामाजिक सञ्जाल वेइबोमा मस्क विरुद्ध कडा असन्तुष्टि व्यक्त गरेका छन् । एक प्रयोगकर्ताले स्पेसएक्सको स्टारलिङ्क उपग्रह फोहोर मात्र हुन् भनेका छन् । त्यस्तै अर्का प्रयोगकर्ताले यसलाई अमेरिकाको अन्तरिक्ष हतियार भनेका छन् । पृथ्वीको कक्ष उपग्रहहरू र अन्य प्रकारका भग्नावशेषहरूले भरिएको छ जसले अन्तरिक्ष स्टेशन, त्यहाँ अवस्थित उपग्रहहरू र अन्तरिक्ष टेलिस्कोपहरूका लागि ठूलो खतरा निम्त्याउँछ। भविष्यमा सम्भावित टक्करबाट बच्न सकियोस् भनेर वैज्ञानिकहरूले लगातार देशहरूलाई यसको डाटा साझा गर्न आग्रह गरिरहेका छन् ।
‘स्टारलिङ्क’ ले इन्टरनेट स्पीडको संसारमा क्रान्तिकारी परिवर्तन ल्याउने
सन् २०२२ मा स्टारलिङ्कको इन्टरनेट कार्य विश्वभर फैलिने अपेक्षा गरिएको छ। यसको गति ५० एमबिपिएसदेखि १५० एमबिपिएससम्म हुन सक्छ। स्टारलिङ्कका उपग्रहहरू पृथ्वीको नजिक भएकाले इन्टरनेटको गति छिटो हुनेछ। सामान्य इन्टरनेट सेवा नचल्ने वा गति सुस्त भएका क्षेत्रमा यो सेवा थप प्रभावकारी हुनेछ । स्पेसएक्सले इन्टरनेटको गति ३०० एमबीपीएससम्म लैजाने तयारी गरिरहेको छ ।
