काठमाडौं । नेपाली कांग्रेसभित्र देखिएको विवाद मिलाउनका लागि सभापति शेरबहादुर देउवाको टोली र महामन्त्रीद्वय गगन थापा र विश्वप्रकाश शर्माको टोलीीच संवाद सुरु भएको छ ।
देउवाका तर्फबाट कार्यवहाक सभापति पूर्णबहादुर खड्का, रमेश लेखक, बालकृष्ण खाँड र विशेष महाधिवेशन पक्षधरबाट मधु आचार्य, देवराज चालिसे, प्रदीप पौडेल र गुरुराज घिमिरे रहनु भएको छ । वार्ता टोलीबीच सोमबार दिनभरि अनौपचारिक प्रयासहरू भए पनि सफल भएनन् ।
वार्ता टोलीमा रहनुभएका नेता मधु आचार्यले न्यूजपोलारसँग भन्नुभयो ‘आज बिहानदेखि वार्ता होला, सहमतिका लागि उहाँहरुले विशेष महाधिवेशनको स्वामित्व लिनुपर्छ साथै बहुमत महाधिवेशन प्रतिनिधिहरुले गरेको कामलाई अपनत्व लिनु पर्छ र पार्टी रुपान्तरण भएको स्पष्ट र साझा धारणा बन्नु पर्छ ।’
उहाँले भन्नुभयो ‘अपमानकाबीच पनि एकताको हात बढाएका छौँ उहाँहरुले के गर्नुहुन्छ हेर्नुपर्छ ।’
बिशेष महाधिबेशन पक्षधरहरुले राखेका सात सर्त यस्ता छन् ।
१) नेपाली कांग्रेसका २ हजार ४ सय ८८ जना महाधिवेशन प्रतिनिधिहरूले माग गरी आह्वान गरेको विशेष महाधिवेशनको राजनीतिक स्वामित्व नेपाली कांग्रेस केन्द्रीय समितिले लिनुपर्ने ।
२) विशेष महाधिवेशनमा पार्टी सुधारका लागि पेश भएका र सहभागीमार्फत संकलन गरिएका प्रस्ताव र सुझावहरूलाई कांग्रेस केन्द्रीय समितिले ग्रहण गर्ने ।
३) आसन्न प्रतिनिधिसभा निर्वाचनमा पार्टीले कुनैपनि अन्य राजनीतिक दलसँग गठबन्धन नगर्ने ।
४) पार्टीका उम्मेदवारहरू चयन गर्न विधान बमोजिम संसदीय बोर्ड गठन गर्ने । त्यस्तो बोर्ड गठनमा विशेष महाधिवेशन पक्षधरहरूको सम्मानजनक उपस्थिति हुनुपर्ने ।
५) आसन्न प्रतिनिधिसभा निर्वाचनमा टिकट वितरण न्यायोचित एवं सम्मानजनक हुनुपर्ने ।
६) प्रतिनिधिसभा निर्वाचनमा उम्मेदवारलाई वितरण गर्ने टिकटमा सभापति शेरबहादुर देउवाको हस्ताक्षरको सट्टा कार्यवाहक सभापति पूर्णबहादुर खड्काको हस्ताक्षर हुनुपर्ने ।
७) विशेष महाधिवेशनको समापन सत्रमा कार्यवाहक सभापति पूर्णबहादुर खड्का र नेता डा.शेखर कोइराला उपस्थित भएरै सहमतिसमेतको स्वामित्व लिनुपर्ने ।
भृकुटीमण्डपमा आइतबारदेखि महामन्त्रीद्वय गगन थापा र विश्वप्रकाश शर्माको अगुवाईमा विशेष महाधिवेशनमा जारी छ ।
यसैबिच कांग्रेसको केन्द्रीय कार्यसमितिको बैठक आज ११ बजे बोलाइएको छ । पार्टीको केन्द्रीय कार्यालय, बीपी स्मृति भवन, बीपी नगर ललितपुरमा बस्ने बैठकमा केन्द्रीय कार्यसमितिका पदाधिकारी, सदस्यहरु र ७ वटै प्रदेशका सभापतिहरुको उपस्थितिका लागि अनुरोध गरिएको मुख्य सचिव कृष्णप्रसाद पौडेलले जानकारी दिनुभयो ।
