पोर्चुगल। पोर्चुगलको राजधानी लिस्बनस्थित नेपाली दूतावासले पोर्तोमा राहदानी नवीकरण तथा कागजात प्रमाणीकरण (कन्सुलर सेवा)सम्बन्धी दुईदिने घुम्ती शिविर सञ्चालन गर्ने भएको छ ।
दूतावासले यही जनवरी २४ र २५ तारिखका दिन पोर्तोको भिला नोभा दि गइयास्थित नमस्ते पोर्तो रेष्टुराँको हलमा राहदानी नवीकरण तथा कागजात प्रमाणीकरणसम्बन्धी दुईदिने घुम्ती शिविर सञ्चालन गर्ने भएको हो ।
राहदानी नवीकरण तथा प्रहरी चारित्रिक प्रमाणपत्र (प्रहरी रिपोर्ट) लगायतका कागजात प्रमाणीकरणसम्बन्धी समस्यामा परेका पोर्तो क्षेत्रका नेपालीलाई सोही क्षेत्रमै सेवा उपलब्ध गराउने उद्देश्यअनुरुप शिविर सञ्चालन गर्न लागिएको दूतावासले जनाएको छ । दूतावासले टोली खटाएर पोर्तो सहरमा पहिलोपटक घुम्ती शिविर सञ्चालन गर्न लागेको हो ।
दूतावासको टोलीले राहदानीको म्याद सकिएका, हराएका, क्षति भएका तथा राहदानीको म्याद एक वर्षभन्दा कम भएकाहरुको विद्युतीय राहदानी (ई–पासपोर्ट) का लागि जैविक विवरणसहितको आवेदन सङ्कलन गर्ने दूतावासले जनाएको छ । रासस
