काठमाडौं: राजधानी काठमाडाैंबाट शनिबार प्रकाशित नयाँ पत्रिकाले ललितानिवासको जग्गा बकसमा लिनेहरूको नाम सार्वजनिक गरेको छ । समाचार अनुसार बैकुण्ठ शर्मा, उर्मिला शाह, सोदाकुमारी चापागाईं, भवनकुमारी चापागाईं, मोहनप्रसाद भट्टराईलगायतले ललितानिवास जग्गा बकसमा लिएको पाइएको छ ।
त्यस्तै नेपाल ट्रस्टको १५ रोपनी जग्गा हत्याउने पूर्वराजकुमारी प्रेरणा राज्यलक्ष्मी सिंहको अन्तिम प्रयास पनि संवैधानिक इजलासबाट खारेज भएको समाचार नयाँ पत्रिका, नागरिक, अन्नपूर्ण पाेस्ट समेतका दैनिक अखबारले छापेका छन् । नेपाल ट्रस्टको नाममा रहेको काठमाडौंको छाउनीस्थित १५ रोपनी सरकारी जग्गासहितको घर हत्याउने उनको अन्तिम प्रयास विफल भएको हो । प्रेरणाले दायर गरेको रिट शुक्रबार सर्वोच्चले खारेज गरिदिएको छ ।
तत्कालीन प्रधानन्यायाधीश सुशीला कार्की, न्यायाधीशद्वय दीपककुमार कार्की र सपना प्रधान मल्लको इजलासले २०७३ पुस २१ मै सो जग्गा ट्रस्टको हुने अन्तिम फैसला गरेको थियो । तर प्रेरणाले ट्रस्ट नै खारेज गर्नुपर्ने माग गर्दै संवैधानिक इजलासमा रिट दायर गरेकी थिइन् ।
प्राणघातक कोरोना भाइरसको सम्भावित लक्षण जाँच्न त्रिभुवन अन्तर्राष्ट्रिय विमानस्थलमा राखिएको थर्मल स्क्यानर १० दिनमै बिग्रिएको अर्को खबर पनि नयाँ पत्रिकामा छ । कोरोना संक्रमण नेपालमा पनि भेटिएपछि स्वास्थ्य मन्त्रालयले १० माघदेखि विमानस्थलको हेल्थ डेस्कमा दुईवटा थर्मल स्क्यानर सञ्चालनमा ल्याए पनि १० दिन नबित्दै बिग्रिएको हो ।
प्रधानमन्त्री केपी शर्मा ओलीले स्थल, जल र हवाई तीनवटै माध्यमबाट नेपालको विश्वमा कनेक्टिभिटी बढ्ने क्रममा रहेको र यसले विकास तथा समृद्धिमा अत्यधिक सम्भावना ल्याउने भनेर व्यक्त गरेको भनाइलाई कान्तिपुर दैनिकले मुख्य समाचार बनाएको छ ।
शनिबारका पत्रपत्रिकाका मुख्य पृष्ठ
