काठमाडौँ । आईसीसी विश्वकप क्रिकेट लिग–२ मा आज (आईतबार) नेपालले तेस्रो खेलमा ओमानसंग प्रतिस्पर्धा गर्नेछ । तीन दिन अघि नेपालले ओमानसंग खेल्दै सिरिजको सुरुवात गर्दा १८ रनले पराजित भएको थियो । नेपाल पहिलो खेलको बदला लिन चाहान्छ । ओमान शीर्ष स्थानमा पुग्न नेपाललाई पराजित गर्ने लक्ष्यमा हुनेछ । ओमान लिगको दोस्रो स्थानमा रहेको छ । उसले ८ खेलमा ६ जितका साथ १२ अंक जोडेको छ । समान अंक रहेको अमेरिका नेट रनरेटमा ओमान भन्दा अघि छ ।
यता नेपाल भने २ खेलमा १ जित निकाल्दै २ अंक सहित तालिकाको पुछारबाट दोस्रोमा छ ।नेपालले ओमानलाई पछिल्लो ७ वर्षदेखि पराजित गर्न सकेको छैन । हालसम्म नेपाल र ओमान एकदिवसीयमा ८ पटक आमने सामने भएका छन् । जसमा नेपालले सुरुवाती तीन खेल जितेको छ । पछिल्ला ४ खेलमा नेपाल पराजित छ ।
ओमानविरुद्ध मैदान उत्रदै गर्दा अघिल्लो खेलमा गरेको गल्ती नदोहर्याउने योजना रहेको कप्तान ज्ञानेन्द्र मल्लले बताए । सिरिजमा नेपाल र ओमानको यो अन्तिम खेल हो । एक सिरिजमा एक टिमले ४ खेल खेल्ने छन् ।खेल बिहान साढे ९ बजे कीर्तिपुरस्थित त्रिवि क्रिकेट मैदानमा हुनेछ ।
