काठमाडौं । शहीद स्मारक ‘ए’ डिभिजन लिग अन्तर्गत आज (सोमबार) भएको खेलमा सरस्वती युथ क्लब, च्यासल युथ क्लबसँग पराजित भएपछि एक खेल अगावै रेलिगेसनमा परेको छ ।सरस्वती च्यासलसँग २–१ ले पराजित भएको हो। हारपछि १२ खेलबाट ४ अंक मात्र रहेको सरस्वती १४ क्लब सम्मिलित लिगमा पुछारमा छ । खेल सातदोबाटोस्थित एन्फा कम्प्लेक्सको मैदानमा भएको हो ।
एपीएफले १२ खेलबाट ८ अंक जोडेर १३औं स्थानमा रहेको छ । लिगमा अब एक बाँकी रहेको सरस्वतीले अन्तिम खेल जिते पनि एपीएफलाई भेट्ने छैन । टाइगा नाकामुराले खेलको १८ औँ मिनेटमा पाएको फ्रिकिकको अवसरलाई सदुपयोग गर्दै गोल गरेका थिए । ६६ औँ मिनेटमा हायातो वाकिनोले गोल गर्दै च्यासलको अग्रता दोब्बर बनाउन सफल रहे ।
तर सरस्वतीका कजीम बुसारीले अतिरिक्त समयमा सान्त्वना गोल गरे । जितपछि १२ खेलबाट १५ अंक बनाएको च्यासल नवौं स्थानमा छ ।
