काठमाडौँ । इंग्लिस प्रिमियर लिग फुटबलमा टोटेनहमले हार ब्यहोरेको छ ।
गएराति भएको खेलमा टोटेनहम बर्नमाउथसँग ३–२ गोलले पराजित भएको हो । खेलको पाँचौं मिनेटमा नै म्याथिस टेलले गोल गर्दै टोटेनहमलाई सुरुवाती अग्रता दिलाएका थिए ।
२२ औं मिनेटमा इभानिल्सनले गोल गर्दै बर्नमाउथलाई १–१ को बराबरीमा ल्याए । ३६ औं मिनेटमा इलि जुनियर क्रुपीले गोल गर्दै बर्नमाउथलाई २–१ ले अघि बढाए । ७८ औं मिनेटमा जोआओ पालहिन्हाले गोल गरेपछि टोटेनहम २–२ को बराबरीमा आयो ।
तर, खेल सकिनै लाग्दा इन्जुरी समयमा एन्टोनि सेमेन्योले गोल गर्दै बर्नमाउथलाई रोमाञ्चक जित दिलाए । यो नतिजापछि टोटेनहम २१ खेलबाट २७ अंकका साथ तालिकाको १४ औं स्थानमा छ भने बर्नमाउथ २६ अंकका साथ १५ औं स्थानमा छ ।
यस्तै, गएराति नै भएको अर्को खेलमा युनाइटेडले बर्नलेसँग २–२ को बराबरी खेल्दै अंक बाँड्यो । खेलको १३ औं मिनेटमा युनाइटेडका एडेन हिभनले आत्मघाती गोल गरेपछि बर्नले १–० ले अघि बढ्यो ।
यता, ५० र ६० औं मिनेटमा बेन्जामिन सेस्कोले दुई गोल गरेपछि युनाइटेड २–१ ले अघि बढ्यो । तर, त्यसलगत्तै ६६ औं मिनेटमा जेडन एन्थोनीले गोल गर्दै बर्नलेलाई २–२ को स्थितीमा ल्याए । त्यसपछि खेलमा थप गोल हुन सकेन ।
बराबरीको नतिजापछि युनाइटेड ३२ अंकका साथ तालिकाको सातौं स्थानमा छ भने बर्नले १३ अंकका साथ १९ औं स्थानमा छ ।
