काठमाडौं । उर्जा सहित तीन मन्त्रालयको जिम्मेवारीमा रहेका मन्त्री कुलमान घिसिङले अन्ततः राजीनामा दिएका छन् ।
मन्त्री घिसिङसँग प्रधानमन्त्री सुशिला कार्कीले हिजोमात्र मन्त्रिपरिषदमै राजीनामा माग गरेकी थिइन् । उनी र अरु दुई जना मन्त्री जगदिश खरेल र बब्लु गुप्तासँग पनि प्रधानमन्त्रीले राजीनामा माग गरेकी थिइन् ।
यो पनि पढ्नुहोस –कुलमानको ‘काइते’ कुरा
राजधानीमा मंगलबार आयोजित एक कार्यक्रममा मन्त्री घिसिङलाई रास्वपामा सामेल भएको हो वा होइन भनी एक युवाले प्रश्न गरेका थिए । जवाफमा मन्त्री घिसिङले ”म कुनै दलमा आबद्ध छैन” भन्दै संक्षिप्त उत्तर दिएर पन्छिएका थिए ।
केही दिनदेखि नै उनी खुलेआम पार्टी काममा संलग्न रहेको भन्दै सामाजिक संजालमा निर्वाचित सरकारको सिद्धान्त विपरीत रहेकाले मन्त्री घिसिङलाई तत्कालै हटाउनु पर्ने माग बढ्दै थियो ।
घिसिङ संरक्षक रहेको उज्यालो नेपाल पार्टी विधिवत रुपमै रास्वपामा मर्ज भएपछि उनलाई सभापति रबि लामिछाने पछि दोस्रो बरियतामा उपसभापति बनाइएको थियो ।
उनले आफ्नो कार्यकालमा विकास निर्माण समेतका विविध कार्यमा उल्लेखनीय कार्य गरेको दाबी गरे पनि विवादमुक्त हुन सकेका थिएनन् ।
आगामी फागुन २१ ग्ते आह्वान भएको आम निर्वाचनमा मन्त्री घिसिङ काठमाडौँ क्षेत्र नं ३ बाट उम्मेदबार बन्ने तयारीमा छन् । उनले सो क्षेत्रमा निर्वाचन प्रचार नै गरिरहेका छन् ।
मन्त्री घिसिङले मन्त्रीको गाडी चढेर देशव्यापी पार्टी प्रचारका लागेको भनेर पनि व्यापक मात्रामा विरोध भएको थियो ।
गत भदौ २२ र २३ गते भएको जेनजी आन्दोलनका क्रममा तत्कालीन सरकार अपदस्थ भएपछि पूर्व प्रधानन्यायाधीश सुशिला कार्कीको नेतृत्वमा नागरिक सरकार बनेको थियो ।
गैरदलीय नामको सो सरकारकमा रहेका मन्त्रीहरु पार्टीमा लागेपछि प्रधानमन्त्री कार्कीले नै राजीनामा माग गरेकी थिइन् । त्यसको पहिलो किस्तास्वरुप मन्त्री घिसिङले आजै राजीनामा दिएका हुन् ।
