काठमाडौँ। मुख्यसचिव सुमनराज अर्यालले तथ्याङ्क प्राविधिक विषय मात्रै नभई सुशासनको अपरिहार्य तत्व भएको बताउनुभएको छ ।
तथ्याङ्क दिवस–२०८२ का अवसरमा राष्ट्रिय तथ्याङ्क कार्यालयमा आज आयोजित कार्यक्रममा उहाँले तथ्याङ्कीय सुशासनलाई समग्र पक्षबाट हेरिनुपर्ने बताउनुभयो ।
“तथ्याङ्कलाई प्राविधिक भाष्यका रुपमा मात्रै सीमित हुनु हुँदैन, तथ्याङ्कीय प्रणाली २१ औँ शताब्दी सुहाउँदो हुनुपर्छ । यति गर्न सकियो भने मात्रै देशले भोगेको र खोजेको विषय सम्बन्ध गर्न सक्छ”, मुख्यसचिव अर्यालले भन्नुभयो ।
तथ्याङ्कलाई जति विश्वसनीय बनाउन सकियो त्यति नै त्यसले ठूलो अर्थ राख्ने उल्लेख गर्दै उहाँले तथ्याङ्कले समग्र अर्थतन्त्रमा उकास्न सहयोग गर्ने बताउनुभयो ।
तथ्याङ्क ऐन जारी भएपछि यस क्षेत्रमा धेरै सम्भावनाको ढोका खोलेको जनाउँदै मुख्यसचिव अर्यालले अन्तर निकाय तथ्याङ्क कार्य समूहलाई सक्रिय बनाउन सक्दा सरकारलाई नै सहयोग पुग्ने बताउनुभयो । तथ्याङ्क दिवसलाई राष्ट्रिय दिवसका रुपमा मनाउनुपर्नेमा जोड दिँदै उहाँले यसका लागि आफ्नो तर्फबाट सहयोग रहने विश्वास दिलाउनुभयो ।
कार्यक्रममा उपप्रमुख तथ्याङ्क अधिकारी ढुण्डीराज लामिछानेले तथ्याङ्क दिवससम्बन्धी प्रस्तुति दिनुभएको थियो । सो अवसरमा कार्यालयमा कार्यरत कर्मचारीलाई सम्मान गरिएको थियो । रासस
