धादिङ । नेकपा अध्यक्ष एवं पूर्वप्रधानमन्त्री पुष्पकमल दाहल प्रचण्डले बुढीगण्डकी जलविद्युत परियोजनाले नेपालको अर्थतन्त्रमा गुणात्मक परिवर्तन ल्याउने बताएका छन् । शुक्रबारदेखि धादिङवेशीमा सुरु भएको सातौं धादिङ महोत्सवको उद्घाटन गर्दै प्रचण्डले नेपालकै बहुआयामिक महत्वपूर्ण बुढीगण्डकी जलविद्युत परियोजनाले नेपालको अर्थतन्त्रमा र धादिङ तथा गोरखाको जनताको जीवनस्तरमा गुणात्मक परिवर्तन ल्याउने बताएका हुन् ।
प्रचण्डले बुढीगण्डकी जलविद्युत परियोजना जति तिव्र गतिमा निर्माणको कामअघि बढ्नुपर्ने भए पनि त्यस्तो नभएको र अब छिट्टै परियोजना निचोडमा पुग्नेसमेत प्रतिवद्धता व्यक्त गरे । धादिङ र गोरखा जिल्ला मात्र नभर्य समग्र नेपालको विकासको लागि पनि बुढीगण्डकी जलविद्युत आयोजना मुख्य रहेको समेत दाहालले बताए । उनले पछिललो समय धादिङ जिल्लाले विस्तारै आर्थिक वृद्धि हासिल गर्दै गएको भन्दै कृषि, पर्यटन, जडिबुटि, धार्मिकलगायत आर्थिक विकासको क्षेत्रमा धादिङ पहिलो जिल्ला रहेको र उद्योग धन्दामा पनि अघि बढ्दै गएको बताए ।
प्रचण्डले पार्टी एकतापछि कसैले सोच्नै नसकेका परिवर्तनहरू भएको समेत जिकिर गरे । असम्भव भएका कुराहरू विस्तारै सम्भव हुँदै गएको बताए । एक अर्कालाईमा निषेध गर्ने, एक अर्कालाई हिंसा र प्रतिहिंसाकै बलमा सिध्याउछु भन्नेहरू हात मिलाउने ठाउँमा आए, शान्ति सम्झौता भए, संविधान सभाको निर्वाचन सम्पन्न जस्तो अकल्पनीय कामहरू भएको उनको भनाइ थियो । ‘धादिङको दिगो विकास र अर्थतन्त्रको आधार, कृषि जलस्रोत, पर्यटन र उद्योगको पूर्वाधार’ भन्ने नारा सहित शुक्रबारदेखि सातौँ धादिङ महोत्सव सुरु भएको छ ।
धादिङ उद्योग वाणिज्य संघको आयोजनामा सुरु भएको महोत्सवको आज नेकपाका अध्यक्ष एवं पूर्व प्रधानमन्त्री पुष्पकमल दाहालले उद्घाटन गरेका हुन् । महोत्सव अवधिभर २ लाख दर्शकले अवालोकन गर्ने र ५ करोड भन्दा बढी कारोबार हुने लक्ष्य राखिएको छ । नीलकण्ठ नगरपालिका वडा नम्बर ३ खुल्लामञ्चमा सुरु भएको महोत्सवमा आज धादिङवासीको पुछारबजारदेखि विभिन्न जातजाति र भाषाभाषीको झाँकी प्रदर्शन गरिएको थियो ।
जिल्लाको कृषि, पर्यटन तथा औद्योगिक क्षेत्रको प्रचारप्रसार तथा भ्रमण वर्ष २०२० लाई लक्षित गर्दै आयोजना गरिएको धादिङ उद्योग बाणिज्य संघले जनाएको छ । महोत्सवको मुख्य आकर्षणको रूपमा कृषि प्रर्दशनी, घरेलु तथा साना उद्योगबाट उत्पादित वस्तुको प्रदर्शनी, विभिन्न औद्योगिक उत्पादनको प्रदर्शनी तथा बिक्री वितरण रहेका छन् ।
महोत्सवमा राष्ट्रिय तथा स्थानीय कलाकारद्वारा कला प्रदर्शन, स्थानीय तहमा उत्पादन हुने वस्तु तथा सेवाको प्रदर्शनी, हस्तकलाबाट निर्मित सामग्री, खनिजजन्य वस्तुको प्रर्दशनी, दुग्धजन्य पदार्थको प्रदर्शनी, जडीबुटी प्रदर्शन तथा बिक्री स्टल राखिएको छ । सौर्य दैनिकबाट
