लहान । इरान र पाकिस्तानसहित १२ मुलुकका मुस्लिम सप्तरीमा भेला भएका छन् । उक्त भेलालाई भारतीय गुप्तचरले उच्च निगरानी राखेको छ । सप्तरीको बोदेबर्साइन नगरपालिका–५ जाँजरमा मुस्लिम समुदायको तीन दिने धार्मिक सम्मेलन ‘इज्तिमा’ शनिबारदेखि सुरु भएको छ । तेस्रो मुलुकको प्रतिनिधिलाई सहभागी नगराउने आयोजकको प्रतिबद्घता पश्चात सरकारले कार्यक्रम गर्न बाटो खोलिदिएपछि ४० लाखभन्दा बढीको सहभागिता रहेको धार्मिक सम्मेलन ‘इज्तिमा’ सुरु भएको हो ।
यद्यपि सम्मेलनमा भारत, पाकिस्तान, बंगलादेश, साउदी अरेबिया, कतार, मलेसिया, इराक, इरान, अफगानिस्तान र अमेरिकाबाट श्रद्धालुहरू सहभागी भएको स्रोतको दाबी छ । कडा सुरक्षा र निगरानीका बीच सुरु भएको धार्मिक सम्मेलनमा नेपाल र भारतको मुस्लिमको मात्र सहभागिता रहेको र अन्य मुलुकबाट सहभागी हुन आएकाहरूलाई सम्झाइबुझाई फिर्ता पठाइएको धार्मिक सम्मेलन आयोजक समितिका संयोजक मो. गफुरले जानकारी दिए । उनले विशुद्घ धार्मिक कार्यक्रम आपसी र सामाजिक सद्भावका लागि भएकाले कसैले शंका गर्न नहुने आग्रह पनि गरे ।
४० लाखभन्दा बढी सहभागी मुस्लिम धर्मालम्बीहरूद्वारा संयुक्त रूपमा पवित्र नमाज र प्रार्थनापश्चात सुरु भएको धार्मिक सम्मेलन इज्तिमाको पहिलो दिन सहभागीहरूलाई मुस्लिम आयोगकका अध्यक्ष समिम अंसारीले स्वागत गरे लगत्तै मुख्य प्रवचन भारत दिल्लीस्थित मर्कट जामे मस्दिजका मौलाना मो। सादले प्रवचन गरेका छन् । उनले सुरुमै मानव कल्याण तथा आपसी सद्भावका लागि आयोजित धार्मिक कार्यक्रमलाई भव्य र सभ्य बनाउन सबैसँग आग्रह गर्दै प्रवचनको सुरुआत गरेका थिए ।
कार्यक्रमस्थलमा महिला प्रवेशलाई पूर्ण निषेध गरिएको छ भने पूर्वअनुमति बगेर फोटो खिच्न रोक लगाइएको छ । यस्तै कोरोना भाइरस संक्रमित व्यक्ति भित्रिन सक्ने उच्च जोखिम तथा अन्य स्वास्थ्य उपचारका लागि कार्यक्रम स्थलभित्र ६ ठाउँमा स्वास्थ्यकर्मी राखेर हेल्थडेक्सको स्थापनासमेत गरिएको छ । सम्मेलन स्थलमा शान्ति सुव्यवस्था मिलाउन डिएसपी तिलक भारतीको नेतृत्वमा ठूलो संख्यामा सुरक्षाकर्मी परिचालन गरिएको छ । डिएसपी भारतीले २ सय ५० नेपाल तथा ३ सय ५० सशस्त्र गरी शान्ति सुरक्षाका लागि ६ सय सुरक्षाकर्मी परिचालित रहेको जानकारी दिए ।
यस्तै कार्यक्रम स्थलमा व्यवस्थापनका लागि आयोजक समितिले २ सय ५० स्वयसेवक परिचालन गरेको छ भने ठूलो संख्यामा आएका सहभागीका लागि २ हजार २ सय अस्थायी शौचालय निर्माण गरिएको छ । त्यस्तै स्वच्छ खानेपानीका लागि २ सय ५० धारा जडान गरिएको छ । करिब दुई सय विघा जग्गामा २१ लाख ६० हजार स्क्वायर फिटको पण्डाल र टहरा निर्माण गरिएको छ । पहिलोदिन शनिबार दुई लाख सहभागी आइसकेको र अझ आउने क्रम जारी रहेकाले यो संख्या ६० लाखसम्म पुग्ने अनुमान गरिएको आयोजक समितिका संयोजक मो. गफुरले बताएका छन् ।
नेपाल–भारत सीमा नजिकै सुरु भएको कार्यक्रमलाई भारतीय सुरक्षा अधिकारीले पनि विशेष चासोका साथ हेरिरहेको छ । कार्यक्रम स्थलमा केही सादा पोसाकमा भारतीय प्रहरी निगरानी गरिरहेको समेत स्थानियले जानकारी दिएका छन् । आन्दोलनमा प्रभाव पर्ने भन्दै भारतीय पक्ष सन्तुष्ट छैन । अझ कार्यक्रममा पाकिस्तान र बंगलादेशका मुस्लिमहरूको उल्लेख्य सहभागिता हुने भएपछि उसले सीमावर्ती क्षेत्रमा सुरक्षा कडा बनाएको छ । सौर्य दैनिकबाट
