काठमाडाैंः कलंकीमा सोमबार साँझ भयानक दुर्घटना भएकाे छ । एउटा मालवाहक ट्रकले ९ वटा सवारीसाधनलाई ठक्कर दिएका कारण एक व्यक्तिकाे मृत्यु पनि भएकाे उद्धारमा खटिएका प्रहरीले बताएका छन् ।
थानकोटबाट कलंकी आइरहेको मालवाहक ट्रकको ब्रेक फेल हुँदा ३ मोटरसाइकल, १ स्कुटर, २ मिनीट्रक १ स्कोर्पियो, १ ट्याक्सी र १ सरकारी गाडीलाई ठक्कर दिएको हो। उक्त दुर्घटनामा एक जनाले ज्यान गुमाएको कालिमाटी प्रहरी वृत्तका डिएसपी रुगम कुँवरले जानकारी दिए।
दुर्घटनामा घाइतेमध्ये चारको अवस्था गम्भीर छ। उनीहरुको बीर अस्पतालकाे ट्रमा सेन्टरमा उपचार भइरहेको छ। सर्लाही घर भएका ट्रक चालक वीरेन्द्रकुमार साहलाई नियन्त्रणमा लिइएको डिएसपी कुँवरले जानकारी दिए। ट्रक पनि नियन्त्रणमा लिइएको र थप छानविन भइरहेको उनले बताए।
