भोजपुर। भोजपुरको भोजपुर नगरपालिका–९ काफ्लेस्थित जनकल्याण आधारभूत विद्यालयमा इ–लर्निङ सेन्टर स्थापना गरिएको छ ।
विद्यार्थीहरुलाई समय सापेक्ष प्रविधिमैत्री शिक्षणमा जोड दिन ईश्वर मन्दिर काठमाडौँ अभियानले विद्यालयमा इ–लर्निङ सेन्टर स्थापना गरिदिएको हो ।
१० थान डेस्कटप कम्प्युटर, एक थान स्मार्ट टिभी उपलब्ध गराइ यहाँ सेन्टर सञ्चालनमा ल्याइएको ईश्वर मन्दिर काठमाडौँका महासचिव सङ्केत कोइरालाले जानकारी दिनुभयो ।
इ–लर्निङ सेन्टर स्थापनाले विद्यार्थीहरुलाई प्रविधिमैत्री शिक्षणमा सहयोग पुग्ने विद्यालयका प्रधानाध्यापक योगराज लुइँटेलले बताउनुभयो । आवश्यकताका आधारमा विद्यालय समय र विद्यालयभन्दा अन्य समयमा समूह निर्माण गरेर प्रविधिमैत्री शिक्षण गराइने उहाँले जानकारी दिनुभयो ।
उहाँले भन्नुभयो, “सेन्टर स्थापनाले विद्यार्थीलाई समय सापक्ष प्रविधिमैत्री शिक्षण गराउन सहज हुनेछ । अब हामीले प्रविधिमैत्री शिक्षणमा जोड दिन्छौँ ।” सबै विद्यार्थीलाई प्रविधिसम्बन्धी ज्ञान प्रदान गर्न समूह निर्माण गरेर शिक्षणमा जोड दिइने उहाँको भनाइ छ । रासस
