काठमाडौँ । नेपाली कांग्रेसका नेता चन्द्र भण्डारीले आगामी पुसमा हुने १५ औं महाधिवेशनमा पार्टी सभापति पदमा प्रतिस्पर्धा गर्ने घोषणा गरेका छन्।
भण्डारीले बुधबार सामाजिक सञ्जाल फेसबुकमार्फत आफ्नो सभापति पदप्रतिको आकांक्षा सार्वजनिक गर्दै नेतृत्वप्रतिको दृष्टि पहिले नै तय भएको बताए। उनले लेखेका छन्, ‘नेपाली कांग्रेसको १५ औं महाधिवेशनमा सभापति पदप्रति मेरो आकांक्षा स्पष्ट छ, दृष्टिकोण पनि उति नै निर्धारित!’
१४औं महाधिवेशनमा उपसभापति पदमा पराजित भएका भण्डारी त्यसपछि मनोनयनमार्फत केन्द्रीय सदस्य बनेका थिए। हाल गुल्मी क्षेत्र नं. १ बाट निर्वाचित प्रतिनिधिसभा सदस्यका रूपमा सक्रिय भण्डारी कांग्रेसभित्र स्वच्छ छवि, प्रस्ट धारणा र वैचारिक स्पष्टताका कारण लोकप्रिय हुँदै आएका छन्।
आफ्नो पोस्टमा उनले नेतृत्व चयनमा व्यक्तिगत आकांक्षाभन्दा देश, जनता, प्रजातन्त्रको हित र संगठनको आवश्यकता प्रमुख हुने उल्लेख गरेका छन्। ‘जहाँ देश, जनता र संगठनको आवश्यकता उभिन्छ, त्यहीअनुसार शून्यदेखि सयसम्म– जसरी आवश्यक पर्छ, त्यस्तै रूपमा अघि बढ्न तयार छु,’ उनले लेखेका छन्।
भण्डारी कांग्रेसभित्र शेखर कोइराला पक्षसँग नजिक मानिए पनि उनले हाल शेखर–गगन समूह वा देउवा पक्ष— कुन समूहसँग उभिने भन्ने खुलाउने अवस्था अझै आएको छैन।
