काठमाडौँ । सशस्त्र प्रहरी बलका महानिरीक्षक (आईजीपी) राजु अर्याल भदौ २३ र २४ का घटनासम्बन्धी बयान दिन छानबिनका लागि गठित जाँचबुझ आयोग पुगेका छन्।
जेन–जी आन्दोलनका क्रममा भदौ २३ गते देखिएको परिस्थिति, त्यसको भोलिपल्ट अर्थात् भदौ २४ गते उत्पन्न तनावपूर्ण स्थिति, नयाँ बानेश्वर क्षेत्रको सुरक्षा व्यवस्थापन तथा सुरक्षा निकायबीचको समन्वय अभावबारे आयोगले अर्यालसँग विस्तृत रूपमा जानकारी लिइरहेको आयोग स्रोतले जनाएको छ।
उक्त घटनामा सशस्त्र प्रहरीको भूमिका, निर्णय प्रक्रिया र सुरक्षा संयोजनका विषयमा पनि आयोगले प्रश्न सोधपुछ गरेको छ।
यसअघि आयोगले नेपाल प्रहरीका तत्कालीन आईजीपी चन्द्रकुबेर खापुङ, काठमाडौंका तत्कालीन प्रमुख जिल्ला अधिकारी छवि रिजाललगायत जिम्मेवार अधिकारीहरूको बयान लिइसकेको छ।
आयोगले अब तत्कालीन प्रधानमन्त्री केपी शर्मा ओली तथा तत्कालीन गृहमन्त्री रमेश लेखकसँग पनि बयान लिने तयारी गरेको छ।
