काठमाडौँ । नेपाल प्रिमियर लिग (एनपीएल) अन्तर्गत सुदूरपश्चिमको अपराजित यात्रा कायमै छ । भर्खरै सम्पन्न खेलमा सुदूरपश्चिमले चितवन राइनोजलाई ४९ रनले हराएको हो । १७० रनको लक्ष्य पछ्याएको चितवन १७.१ ओभरमा १२० रनमै अलआउट भयो ।
उसका लागि रवि बोपाराले २९, देव खनालले २८, अर्जुन साउदले १६, कुशल मल्लले १५ रन बनाउँदा अन्य ब्याट्सम्यानले दोहोरो अंकमा रन बनाउन सकेनन् ।
बलिङतर्फ सुदूरपश्चिमका पुनित मेहराले तीन विकेट लिँदा हिक्मत महरा, अविनाश बोहरा, इशान पाण्डे र हरमित सिंहले एक–एक विकेट लिए ।
त्यसअघि टस हारेर ब्याटिङ थालेको सुदूरपश्चिमले २० ओभरमा ४ विकेटको क्षतिमा १६९ रन जोड्यो ।
उसका लागि क्रिश लिनले सर्वाधिक ७५ रनको योगदान दिए । उनी रिटायर्ड हर्ट भए । ५६ बल खेलेका उनले ५ चौका र ३ छक्का प्रहार गरे । यस्तै, आरिफ शेख र दिपेन्द्र सिंह ऐरीले अविजित २४–२४ रन बनाउँदा विनोद भण्डारीले २१ तथा पुनित मेहराले १३ रन जोडे ।
बलिङतर्फ चितवनका सैफ जइबले दुई तथा रञ्जित कुमार र जर्ज स्क्रिम्शले एक–एक विकेट लिए ।
यसअघि नै प्लेअफमा स्थान बनाइसकेको सुदूरपश्चिमको ६ खेलबाट १२ अंक छ । टोलि शीर्षस्थानमा यथावत छ ।
सुदूरपश्चिमले अब क्वालिफायर-१ खेल्नेछ । यस जितले विराटनगर किंग्स पनि प्लेअफका लागि छनोट भएको छ । प्लेअफको चौथो स्थानमा लागि लुम्बिनी, पोखरा, चितवन र जनकपुरको सम्भावना बाँकी छ ।
पराजित चितवन समान खेलबाट ४ अंकका साथ अंकतालिकाको चैटौं स्थानमा छ । चितवनको प्लेअफ यात्रा भने निकै कठिन बनेको छ । टोलि अन्यको नतिजामा भर पर्नुपर्नेछ । चितवनले अब अन्तिम खेल पोखरा एभेन्जर्ससँग खेल्नेछ ।
