काठमाडौँ । कालिकोटको नरहरिनाथ गाउँपालिका–७ मा ओगडेनी सिरुपाटा–उच्छव आडिखोला सिँचाइ कुलो निर्माणमा भएको १९ लाख ४८ हजार रुपैयाँभन्दा बढीको भ्रष्टाचार सम्बन्धी मुद्दा अख्तियार दुरुपयोग अनुसन्धान आयोगले विशेष अदालतमा दायर गरेको छ।
आयोगका अनुसार निर्माण कार्य अधूरो हुँदा पनि झुट्टा प्रतिवेदन तयार पारेर रकम भुक्तानी गराइएको थियो।
मुख्य भूमिकामा रहेकी तत्कालीन उपाध्यक्ष मनसोभा बुढा लगायत तत्कालीन वडाध्यक्ष दलबहादुर विश्वकर्मा, निमित्त प्रमुख प्रशासकीय अधिकृत, प्राविधिक तथा उपभोक्ता समितिका पदाधिकारीसहित ९ जनालाई प्रतिवादी बनाइएको छ।
९३० मिटरको सट्टा मात्र ३५४ मिटर कुलो बने पनि कागजमा ७३० मिटर भएको देखाइ साढे १९ लाख रुपैयाँ बढी मूल्यांकन गरी भुक्तानी लिईएको अनुसन्धानले पुष्टि गरेको छ।
श्रमिकलाई ज्याला नदिई रकम आफैँ उपभोग गरिएको तथ्य पनि प्रमाणित भएको आयोगले जनाएको छ।
अख्तियारले प्रतिवादीहरूविरुद्ध बिगो असुल, कैद र जरिवाना मागदाबी गरेको छ।
[pdf-embedder url=”https://newspolar.com/wp-content/uploads/2025/12/Scdq4m.pdf”]
