काठमाडौं । लोकप्रिय छवी बनाएका उर्जा, जलस्रोत तथा सिँचाई मन्त्री कुलमान घिसिङ र काठमाडौं महानगरपालिकाका प्रमुख बालेन्द्र (बालेन) शाहबीच आगामी चुनावमा एउटै मोर्चा बनाएर जाने विषयमा वार्ता भएको छ । यो छलफल कति सार्थक बन्छ भन्ने टुंगो भने लागेको छैन ।
मन्त्री घिसिङले आइतबार साँझ बालेनसँग सँगै बसेको फोटो सामाजिक सञ्जालमा पोस्ट गर्दै ‘देश बनाउने अभियानमा सँगै छौं’ भने । यो पोस्टले राजनीतिक वृत्तमा चर्चा चुलिएको छ ।
कुलमान हालै उज्यालो नेपाल पार्टी खोले राजनीतिमा होमिएका छन् । अर्कोतर्फ काठमाडौं महानगर प्रमख बालेनले भने अहिलेसम्म दल खोलेका छैनन् । बरु अरुलाई सहयोग गर्ने विषयमा धेरै पटक छलफल गरिसकेका छन् ।
यसअघि पनि कुलमान र बालेनबीच सहकार्य हुने बारेमा बेलाबेलामा चर्चा हुने गरेको थियो । तर यस पटक कुलमानले नै बालेनसँग बसेको फोटो सेयर गर्दै देश बनाउने अभियानमा सँगै छौं भन्ने लेखेर आफूहरु एकठाउँमा उभिन लागेको सन्देश दिएका छन् ।
त्यो त बालेन सचिवालयका अनुसार यो भेट शनिबार बालेनकै निवासमा भएको हो । तर भेट जहिले भए पनि मुख्य कुरा उनीहरुबीच चुनावी सहकार्य हुन्छ कि हुँदैन भन्ने हो ।
कुलमानले सबै पक्षलाई मिलाएर आफू अघि बढ्ने बताउँदै आएका थिए । उनले आगामी चुनावमा बहुमत ल्याउने गरी जेन–जी आन्दोलनपछि गठन भएका नयाँ र वैकल्पिक भनिएका दलहरुसँग पनि सहकार्यको तयारी थालेका छन् ।
कुलमानले रवि लामिछाने नेतृत्वको राष्ट्रिय स्वतन्त्र पार्टीसँग पनि पटकपटक छलफल गरेका थिए । तर रास्वपासँग कुरा नमिलेपछि उनले आफ्नै अग्रसरतामा उज्यालो नेपाल पार्टी दर्ता गराएका हुन् ।
रास्वपाले बालेनलाई आफ्नो पार्टीमा भित्र्याउन पहल नगरेको होइन । तर सफल नभइरहेको अवस्थामा अब कुलमान र बालेनबीच नयाँ गोरेटो कोरिएको छ । जुन बाटोले उनीहरुलाई थप स्प्ष्ट हुँदै अघि बढ्ने बाटो खुला हुने छ ।
