काठमाडौं। नेपाली कम्युनिस्ट पार्टी (नेकपा)को गण्डकी प्रदेशमा आयोजित एकता सन्देश सभामा शुक्रबार जनसमुदायको उल्लेख्य भीड जुट्यो ।
१५ भन्दा बढी कम्युनिस्ट घटक एकीकृत गर्दै आयोजित उक्त कार्यक्रममा पार्टी एकताको सशक्त सन्देश दिन केन्द्रिय नेतृत्व एकै मञ्चमा उभिएको थियो।
सभाको वातावरण उत्साह, नारा र प्रतिबद्धताले भरिएको थियो। तर कार्यक्रमको अन्तिमतिर नेकपाका शीर्ष नेता तथा पूर्व एमाले उपाध्यक्ष डा. भीम रावलको एक वाक्यले सभा हल केही समय हास्य र अचम्मको वातावरणमा परिणत भयो।
लामो र भावनात्मक सम्बोधनको अन्तिम भागमा पुगेका रावलले अनायासै भने— ‘आउने निर्वाचनमा नेकपा (एमाले) को बहुमतको यात्रालाई कसैले रोक्न सक्ने छैन।’
सुरुमा नारा ‘नेपाली कम्युनिस्ट पार्टी’ का पक्षमा तयार भएको कार्यक्रमस्थल यो वाक्यसँगै एकाएक गुन्गुनायो।
मञ्चबाट कार्यक्रम सञ्चालकले तुरुन्तै सच्याउँदै माइकमै भने— “नेपाली कम्युनिष्ट पार्टी भन्नुहोस् न, नेकपा (एमाले) भन्नुभयो।”
सञ्चालकको सूचनापछि रावलले अक्मक्किँदै आफ्नो वाक्य सच्याए र पुनः भने—“नेपाली कम्युनिष्ट पार्टीको यात्रालाई कसैले रोक्न र छेक्न सक्दैन।”
त्यसपछि उनले उपस्थित भीडलाई नारा घन्काउन अपिल गरे— “नेपाली कम्युनिस्ट पार्टी जिन्दावाद!” सभास्थल फेरि नारामय वातावरणले भरियो ।
रावलले आफ्नो सम्बोधनमा १५ भन्दा बढी कम्युनिस्ट घटकलाई एक ठाउँमा ल्याएको ऐतिहासिक कदमका रूपमा प्रस्तुत गर्दै आत्मालोचना पनि गरे।
उनले भने— “विगतमा कहीँ गल्ती भएको छ भने क्षमा गर्नुहुनेछ। अब स्वाधीन र समृद्ध नेपाल निर्माणका लागि हाम्रो जग्गा, जमिन, जलस्रोत नेपाली जनताको हितमा उपयोग गर्दै रोजगारीका अवसर सिर्जना गर्ने दिशामा दृढतापूर्वक अघि बढ्छौं।”
गण्डकीको पोखरा, कैलालीदेखि देउखुरीसम्मका विशाल सभाहरूले पार्टी एकताबारे देशव्यापी भरोसा बढाएको पनि उनले उल्लेख गरे।
तर आफ्नो अन्तिम निष्कर्षमा भने उनले झुक्किएर ‘नेकपा (एमाले)’ को नाम लिँदा सभा क्षणभर हल्का हल्का हाँसो छायो, जसलाई उनले तुरुन्तै सच्याएर सम्बोधन समापन गरे।
