काठमाडौं । नेपाली कांग्रेसमा महाधिवेशन कार्यतालिकाको मितिलाई लिएर बढेको किचलो अझै साम्य भएको छैन । एकातिर मिलाउन खोज्दा अर्कोतिर बिग्रने स्थिति देखिएको छ । जसले कांग्रेस पार्टी नै विभाजनको संघारमा पुगेको छ ।
पार्टीको कार्यकारी भूमिकाबाट बिदा लिने घोषणासहित कार्यवाहक सभापतिको जिम्मेवारी पूर्णबहादुर खड्कालाई दिएका सभापति शेरबहादुर देउवा फेरि सक्रिय भएका छन् । उनले विवाद मिलाउन हरसम्भव प्रयास गरेको देखिन्छ । तर उनको प्रयासले पनि सार्थकता पाउन सकेको छैन ।
महाधिवेशनको कार्यतालिकालाई लिएर विवाद बढिरहेका बेला असोज २८ गतेदेखि सुरु भएको केन्द्रीय समितिको बैठकले ठोस निर्णय लिन सकेको छैन । केन्द्रीय समिति बैठक पटकपटक गरी ८ पटक त स्थगित भएको छ । बैठक बाहिर औपचारिक, अनौपचारिक छलफल भने जारी छन् । आजका लागि तय भएको केन्द्रीय समितिको बैठक फेरि सूचना जारी गरी भोलिसम्मका लागि सारिएको छ ।
महाधिवेशनको मितिबारे कांग्रेसमा आन्तरिक किचलो लम्बिँदा सभापति देउवा आफैंले अग्रसरता लिएर छलफल गरिरहँदा पनि नेताहरूबीच सहमति जुट्न सकेको छैन । सभापति देउवा पुस मसान्तभित्र महाधिवेशन गर्न सहमत भएको दाबी कांग्रेसका केही नेताहरुले गरेका छन् । विशेष महाधिवेशनको माग भइरहेका बेला बेलाले भने नियमित महाधिवेशन नै गराउनुपर्नेमा जोड दिएका छन् ।
सभापति देउवाले कार्यवाहक सभापति पूर्णबहादुर खड्का, नेताहरू शेखर कोइराला, कृष्णप्रसाद सिटौला, विमलेन्द्र निधि, रमेश लेखक, महामन्त्रीद्वय गगन थापा र विश्वप्रकाश शर्मालगायतसँग छलफल गरी पुस भित्रै नियमित महाधिवेशन गराउने गरी सहमतिका कार्यतालिका ल्याउन निर्देशन दिएका छन् ।
देउवाले पुसमा नियमित महाधिवेशनको कार्यतालिका ल्याउन कार्यवाहक सभापति पूर्णबहादुर खड्कालाई निर्देशन दिएपछि कृष्णपसाद सिटौला र विमलेन्द्र निधिले असन्तुष्टि जनाएका छन् । उनीहरुले कुनै पनि हालतमा चुनाव अघि महाधिवेशन गर्न नसकिने अडान राखेका छन् ।
तर महामन्त्री गगन थापाले भने जेन–जी आन्दोलनको विकसित परिस्थितिमा विशेष महाधिवेशमै जानुपर्ने माग गर्दै आएका छन् ।
नेताहरू रमेश लेखक, शेखर कोइराला र महामन्त्री विश्वप्रकाश शर्माले पनि पुसमा नियमित महाधिवेशन नै गर्दा उपयुक्त हुने मत राखेका थिए ।
सभापति देउवाले कार्यवाहक सभापति खड्कालाई नियमित महाधिवेशनको कार्यतालिका ल्याउन निर्देशन दिए पनि उनको भूमिका समेत शंकास्पद छ । सहमति नभएसम्म केन्द्रीय समितिको बैठक सारेको सार्यै गर्ने बताएका खड्काले भने सहमतिमा कुनै प्रस्ताव अघि ल्याउन सकेका छैनन् । पूर्वपदाधिकारीहरुको दबाबमा रहेका उनले महामन्त्रीहरुलाई पनि बिच्क्याउन चाहेका छैनन् । तर उनले दुवै पक्षलाई दबाब पुग्ने गरी मध्यमार्गी प्रस्ताव ल्याउन सकेका छैनन् ।
खड्का आफैं पनि भावी नेतृत्वका आकांक्षी हुन् । आगामी महाधिवेशनबाट उनी सभापति बन्ने अभियानमा भित्रभित्रै लागेका छन् । अझ देउवाको उत्तराधिकारी बनेर नेतृत्व लिने चाहना छ । तर त्यसका लागि सबै पक्षसँग उस्तै सम्बन्ध कायम गर्नुपर्ने भएकाले उनले कसैलाई बिच्क्याउन चाहेका छैनन् । त्यही कारण उनले कहिले संस्थापन पक्षका नेताहरुसँग त कहिले महामन्त्रीहरुसँग मिले जस्तो कुरा गरेर उनले दोहोरो भूमिका निर्वाह गरिरहेको देखिन्छ । यसले पनि कांग्रेसले निकास पाउन नसकेको हो ।
