काठमाडौं । राप्रपा नेपालका अध्यक्ष कमल थापाले समान विचारधारा भएका दलहरूसँग एकता गर्ने राष्ट्रिय प्रजातन्त्र पार्टीको निर्णयको स्वागत गर्दे राजेन्द्र लिङ्देन र सम्पूर्ण राप्रपा नेतृत्व पंक्तिलाई धन्यवाद दिनु भएको छ ।
राप्रपाको आज बसेको बैठकले समान विचारधारा भएका दल, अभियान, समुह र व्यक्तिहरूसँग एकता, मोर्चा र सहकार्यका लागि वरिष्ठ नेता उपाध्यक्षहरु बुद्धिमान तामाङ, विक्रम पाण्डे र ध्रुब बहादुर प्रधान रहेको वार्ता समिति गठन गरेको थियो ।
थापाले सामाजिक संञ्जालमा लेख्नुभएको छ- जेन्जी आन्दोलनपछि तीव्रगतिमा भइरहेको राजनीतिक ध्रुवीकरणको सन्दर्भमा राष्ट्रवादी शक्तिहरूको एकता अनिवार्य बनेको थियो।
भ्रष्टाचारको अन्त्य र सुशासन कायम गर्ने जेन्जी युवाहरूको आन्दोलनको अधुरो कार्य पूरा गर्ने जिम्मेवारी अब राष्ट्रवादी शक्तिहरूको काँधमा आएको छ।
अब ढिलो नगरी एकता प्रक्रियालाई टुङ्ग्याऔँ र भ्रष्टाचारको अन्त्य,सुशासनको प्रत्याभूति एवं हिन्दू राष्ट्र र राजसंस्थाको पुनर्स्थापना गर्न देशव्यापी अभियान सुरु गरौं।
