काठमाडौँ । नेपाल प्रिमियर लिग (एनपीएल) क्रिकेटको सोमबारको दोस्रो खेलमा कर्णाली याक्स र सुदूरपश्चिम रोयल्स भिड्दैछन् । केहीबेरमै सुरु हुने खेलमा कर्णालीले पहिला फिल्डिङ गर्ने भएको छ ।
कर्णालीका कप्तान सोमपाल कामीले त्रिवि क्रिकेट अन्तर्राष्ट्रिय रंगशाला कीर्तिपुरमा टस जितेर सुदूरपश्चिम रोयल्सलाई ब्याटिङका लागि बोलाएका हुन् ।
रोयल्सले पहिलो दुई खेल जितिसकेको छ । रोयल्सले पहिलो खेलमा काठमान्डु गोर्खाज र दोस्रो खेलमा पोखरा एभेन्जर्सलाई पराजित गरेको थियो ।
पहिलो खेलमा चितवन राइनोजसँग पराजित भएको कर्णालीले अघिल्लो खेलमा लुम्बिनी लायन्सलाई हराएको थियो ।
रोयल्स र कर्णालीले अघिल्लो खेल खेलेको टोलीबाट कुनै खेलाडी परिवर्तन गरेको छैन ।
