एजेन्सी । भारतको उत्तर प्रदेश, कानपुरमा एक पुरुषले पूर्वप्रेमिकामाथि जबरजस्ती चुम्बन गर्न खोज्दा जिब्रोको आधा भाग गुमाउनुपरेको छ।
भारतीय सञ्चारमाध्यमका अनुसार ३५ वर्षीय ती पुरुष, जो ‘चम्पी’ नामले परिचित छन्, आफ्नी पूर्वप्रेमिकासँग फेरि निकटता बढाउने प्रयासमा थिए।
विवाहको तयारी गरिरहेकी ती महिलाले उनलाई पहिले नै दूरी कायम गर्न चेतावनी दिएकी थिइन्। तर सोमबार दिउँसो पोखरीमा नुहाउँदै गरेकी महिलालाई देखेपछि चम्पी पछ्याउँदै गए र जबरजस्ती अँगालो हालेर चुम्बन गर्न खोजे।
महिलाले प्रतिरोध गरे पनि उनले प्रयास जारी राखेपछि महिलाले आत्मरक्षाका क्रममा उनको जिब्रो जोडले टोकेर आधा भाग काटिदिइन्।
गम्भीर घाइते चम्पी चिच्याउँदै लडेपछि स्थानीयबासिन्दाले उनलाई उद्धार गरी अस्पताल पुर्याएका थिए। अहिले उनको उपचार भइरहेको जनाइएको छ।
प्रहरी उपायुक्त दिनेश त्रिपाठीले घटनाको पुष्टि गर्दै चम्पीविरुद्ध मुद्दा दर्ता भइसकेको जानकारी दिएका छन्। घटना सम्बन्धी थप अनुसन्धान र कानुनी कारबाही अघि बढाइएको प्रहरीले जनाएको छ।
