काठमाडौं । विश्वमा कोरोना भाइरसको संक्रमितको संख्या बढ्दै जाँदा आल पौने दुई लाख पुगेको छ भने साँढे छ हजार मानिसको मृत्यु समेत भइसकेको छ । चीनबाट देखिएको कोरोना भाइरस अहिले युरोप र अमेरिकामा भयावह रुपमा देखा पर्दैछ । स्रोत र साधनले सम्पन्न देशहरुले पनि कोरोना भाइरसको संक्रमणको पूर्ण रुपमा समाधान गर्न सकेका छैनन् । अहिले विश्व नक्शामा हेर्ने हो भने अधिकांश देश संक्रमित देखाइएको छ । केही देशमा संक्रमण देखिएको छैन ।
जसमध्ये नेपाल मात्र त्यस्तो देश हो जसले संक्रमणलाई पूर्ण समाधान गर्न सकेको छ । विश्व स्वास्थ्य संगठनले नेपाललाई कोरोनाको अति जोखिम भएको मुलुकको सूचीमा राखेको छ । तर नेपालमा कोरोनाको नयाँ संक्रमण नदेखिनुलाई अभूतपूर्व सफलता मानिएको छ । नेपालमा एकजनालाई कोरोना भाइरसको संक्रमण देखिएकोमा ती व्यक्ति पनि संक्रमणमुक्त भइसकेका छन् ।
यसकारण नेपाल सबै कोरोना भाइरसको केसको समाधान गर्ने देशको सूचीमा एक्लो देखिएको छ । नेपालमा कोरोना भाइरसको संक्रमणको आशंकामा पाँच सयभन्दा बढी मानिसको परीक्षण भइसकेको छ । त्यसमध्ये एकजनामा मात्र संक्रमण देखिएको थियो । बाँकी सबै संक्रमणमुक्त भेटिएका थिए ।
