काठमाडौं। नेकपा (एकीकृत समाजवादी)मा विद्रोह गरेका नेताहरू रामकुमारी झाँक्री र किसान श्रेष्ठसहितका नेताहरूले नेकपा (एमाले)का अध्यक्ष केपी शर्मा ओलीसँग भेटवार्ता गरेका छन्।
एमालेका पोलिटब्युरो सदस्य महेश बस्नेतका अनुसार उनीहरूले बिहीबार राति अध्यक्ष ओलीसँग भेट गरेका हुन्। बस्नेतले झाँक्रीसहित ५० जनाभन्दा बढी केन्द्रीय सदस्य एमालेमा फर्किने तयारी भएको दाबी गरेका छन्।
उनका अनुसार आगामी मंसिर २४ गते दिउँसो ३ बजे राष्ट्रिय सभा गृहमा ‘घर फर्कने अभियान’ नामक कार्यक्रम आयोजना गरी उनीहरू औपचारिक रूपमा एमालेमा प्रवेश गर्नेछन्।
यसअघि नेता किसान श्रेष्ठले आफूहरू निशर्त एमालेमा फर्कन तयार रहेको बताएका थिए।
नेकपा एसका अध्यक्ष माधवकुमार नेपालले हालै माओवादी केन्द्रसहितका १० वाम दलसँग एकता गरेका थिए। तर झाँक्री–श्रेष्ठ समूह भने सो एकता प्रक्रियामा सहभागी भएका थिएनन्।
बस्नेतका अनुसार नेताहरूले अध्यक्ष ओलीसँग भेटपछि गुण्डुमा राति १० बजे भेटघाट गरी बिहान २ बजे फर्किएका थिए।
