काठमाडौं। अख्तियार दुरुपयोग अनुसन्धान आयोग (अख्तियार)ले राजस्व रकम हिनामिनाको आरोपमा आन्तरिक राजस्व कार्यालय धरानका तत्कालीन कर अधिकृत तिलक आलेसहित दुईजनाविरुद्ध विशेष अदालतमा मुद्दा दायर गरेको छ।
अख्तियारका अनुसार मोरङको सुन्दरहरैँचा नगरपालिकाले गछिया खोलामा नदीजन्य पदार्थ उत्खननका लागि धरानस्थित स्वामिनारायण निर्माण सेवा प्रालिसँग ९ करोड ५१ लाख ५१ हजार ५१ रुपैयाँ (भ्याटबाहेक)मा ठेक्का सम्झौता गरेको थियो।
उक्त सम्झौताअनुसार कम्पनीले १ करोड २३ लाख ६९ हजार ६४९ रुपैयाँ भ्याट आन्तरिक राजस्व कार्यालयमा दाखिला गर्नुपर्ने थियो। तर तत्कालीन कर अधिकृत आले र कम्पनीका प्रबन्ध निर्देशक सन्तोषकुमार बस्नेतबीच मिलेमतो गरी सो रकम हिनामिना गरेको ठहर अख्तियारले गरेको छ।
अख्तियारले आले र बस्नेतलाई जनही १ करोड २३ लाख ६९ हजार ६४९ रुपैयाँ बराबरको बिगो कायम गरी सोही रकमबराबर जरिवाना र कैद सजायको मागसहित विशेष अदालतमा आरोपपत्र दायर गरेको जनाएको छ।
