काठमाडौं । नेपाली कांग्रेसका केन्द्रीय सदस्य अब्दुल सतारले नियमित महाधिवेशन गर्न नसके विशेष गर्नुपर्ने बताएका छन् । उनले विशेष महाधिवेशन गर्न कसैले पनि खुट्टा कमाउनु नपर्ने बताएका छन् ।
नेपाली कांग्रेसको जारी केन्द्रीय समितिको बैठकमा बोल्ने क्रममा सदस्य अब्दुल सतारले विशेष महाधिवेशनका लागि २ हजार ४८८ प्रतिनिधिले गरेको मागको सुनुवाइ हुनुपर्ने बताए ।
उनले महामन्त्री गगन थापाले पेस गरेको नियमित महाधिवेशनको समय अनुसार महाधिवेशन हुन नसके विशेष महाधिवेशनमा जानैपर्ने बताए ।
नेता सतारले आगामी फागुन २१ गतेको चुनावभन्दा अगाडि नै महाधिवेशन गर्नुपर्ने र नयाँ नेतृत्वसहित पार्टी चुनावमा जानुपर्ने बताए । निर्वाचनभन्दा पहिला महाधिवेशन गरियो भने निर्वाचनमा अन्तर्घात हुन्छ भन्ने तर्क औचित्यहीन रहेको उनको भनाइ थियो ।
