काठमाडौं । यतिखेर काठमाडौँको बसपार्क, कलंकी र बल्खुमा गाउँ फर्किन लागेका मानिसको ठूलो लर्को लागेको छ । नयाँ बसपार्कको टिकट काउन्टरका अनुसार बिहीबारमात्र १० हजार जनाले टिकट लिएका छन् भने अरु त्यति नै नागरिक बिना टिकट यात्रा गरेका छन् । कोरोना संक्रमणको सम्भावित संक्रमणलाई रोक्न भन्दै उनीहरु घर फर्किन लागेका हुन् । हालसालै मात्र स्कुल र कलेज बन्द भएका छन् भने अन्यत्रतिर पनि बन्दप्राय छ । एकातिर कोरोनाको त्रास र अर्कातर्फ स्कुल कलेज बन्द भएपछि काठमाडौंबाट बाहिरने यात्रुको चाप अत्यधिक बढेको छ । काठमाडौंका मुख्य बसपार्क र टिकट काउन्टरहरुमा हिजो देखि नै निकै ठूलो भीड यात्रुको देखिएको छ ।
तर दुःखको कुरा त यो छ कि रोगको त्रासल बालबालिका बोकेर गाउँ जान लागेका धेरैजसो नागरिकले टिकट पाएका छैनन् । टिकटमा कालोबजारी भएको । मूल्यभन्दा बढी मात्रामा टिकटको पैसा भनिएको उनीहरुको गुनासो छ । काउन्टरमा टिकट नपाउने तर बढी मूल्यमा टिकट भन्ने गरेको उनीहरु बताउँछन् । बालबालिकाको परीक्षा सकिएसँगै कोरोना भाइरसको त्रासका कारण गाउँ फर्किन लागेकाहरुलाई टिकट नपाएर हैरानी भएको बताइएको छ । टिकट कालोबजारी हुन थालेपछि यात्रुले दोब्बरसम्म भाडा तिर्नुपरेको गुनासो गरेका छन् । कतिपयले घर फर्किन सवारी नै नपाएर हैरानी भोगिरहेका छन् ।
बिहीबार बिहानैदेखि यस्तो अवस्था देखिएको थियो । शुक्रबार यात्रुको संख्या अझ धेरै बढेको देखिएको छ । यात्रुको चाप बढेसँगै यात्रुबाट बढी भाडा असुल्ने क्रम पनि सुरु भएको हो । बस र सिट नभएको बहाना बनाउँदै भाडा बढी असुल्ने क्रम सुरु भएको खुलेआम देखिएको भए पनि त्यहाँ प्रहरी या अरु कसैले अनुगमन गरेको देखिँदैन । दशैंसहित यात्रुको चाप भएका समयमा यातायात व्यवसायीले विगतमा पनि यसैगरी बढी भाडा असुल्ने गरेका थिए । सोही क्रम अहिले पनि देखिएको छ । बाहिर जान बसपार्कमा पुगेका व्यक्ति भन्दैछन् दलालले दोब्बर भाडा दिए सिट मिलाइदिन्छु भनेका छन् तर काउन्टरमा भने टिकट नै छैन भन्छन् ।
शुक्रबार पनि विहानैदेखि विभिन्न टिकट काउन्टरमा पुगेका यात्रुहरुले भीड बढेको मौका छोपेर व्यवसायीले यात्रुलाई ठग्न सुरु गरेको बताएका छन् । उता यातायात व्यवसायीहरु भने केही दिनदेखि यात्रु घटेर धेरै बस ग्यारेजमा थन्किएकाले समस्या भएको बताउँछन् । मोफसलका ग्यारेजमा बस थन्किएका बस काठमाडौं आउन सुरु गरेकाले शनिबारसम्म टिकट नपाउने अवस्था सहज बन्ने उनीहरुको दावी छ । योसँगै नागरिक भने सरकारसँग आक्रोसित भएका छन् ।
काठमाडौँमा पनि ग्याँस पाइएन, रोगको त्रास छ मास्क पनि कतै पाइएन । यसै मेसोमा घर फर्किउँ भनेको पनि टिकट पाउँदैन– उनीहरुको गुनासो छ । राजधानीमा खाद्यान्नमा नै मूल्य बढेको छ । उता ग्याँस नपाएर समस्या छ । यसैमा घर हिँडेका यात्रु टिकटमा पनि ठगिएपछि सरकार थप रमिते भएको देखिएको छ ।
