काठमाडौंः नेकपा (माओवादी केन्द्र) को आठौं महाधिवेशनबाट चयन भएको केन्द्रीय कमिटीको बैठक आज डाकिएको छ ।
निकै लामो रस्साकस्सी र छलफल पछि अध्यक्ष पुष्पकमल दाहाल प्रचण्डले घोषणा गर्नु भएको केन्द्रीय कमिटीको बैठक पार्टी कार्यालय पेरिसडाँडामा बस्न कठिन भएपछि ललितपुरको सानेपा हाइटमा रहेको हेरिटेज प्लाजामा बस्न लागेको छ ।
बैठक आज अपराह्न ३ बजेका लागि डाकिएको छ । यस बैठकले खासगरी पदाधिकारी चयनका विषयमा छलफल गरी टुंगो लगाउने बताइएको छ ।
पदाधिकारीका आकाँक्षीको संख्या बढेसँगै महाधिवेशन प्रतिनिधिहरुबाट पदाधिकारी चयन गर्नुको साटो पार्टीले केन्द्रीय कमिटीका सदस्यबाट पदाधिकारी चयन गर्ने निर्णय गरेको थियो ।
माओवादीका एक नेताका अनुसार पार्टी कार्यालय साँघुरो भएकाले होटलमा केन्द्रीय कमिटीको बैठक गर्नु परेको हो ।
माओवादीको केन्द्रीय कमिटीमा हाल २९९ सदस्य छन् । तर खुलातर्फ १११ र समानुपातिक १२५ जना केन्द्रीय सदस्यहरुको नाम मात्र महाधिवेसनले सर्वसम्मतिले पारित गरेको छ । बाँकी ६३ जना र विधानले थप गर्न मिल्ने १५ प्रतिशत केन्द्रीय सदस्य चयन गर्नै बाँकी छ ।
