राजन के.सी, काठमाडौं । सन् २०१९ को अन्त्यतिर चीनको वुहानबाट सुरुभएको कोरोना भाइरसको पहिलो संक्रमण अमेरिकाको न्यूयोर्कमा २०२० मार्च १ तारिकमा मात्र देखिएको थियो ।
सारा विश्व कोरोना संक्रमणबाट जोगिन सचेत र सावधान बनेको समयमा मार्च २ तारिकमा न्यूयोर्कका मेयरले गरेको एउटा ट्वीटका कारण अहिले न्यूयोर्क कोरोनाको कहरमा पुगेको छ भने विस्तारै पुरै अमेरिका यसको केन्द्र बन्दैछ ।
सारा विश्वले कोरोनाबाट आफ्ना जनतालाई जोगाउन लकडाउनमा गइसकेको अवस्था थियो । तर न्यूयोर्कमा पहिलो संक्रमण देखिएपछि पनि अमेरिकीहरु सचेत बनेनन् । बरु न्यूयोर्कका मेयर बिल डे ब्लासियोले गत मार्च २ तारिखमा गरेको ट्वीटले अमेरिकामा महामारी निम्त्याउने काम गर्यो । ट्वीटमा उनले सबै न्यूयोर्कबासीलाई आफ्नो दैनिक जीवनलाई निरन्तरता दिन मात्र भनेनन् मानिसहरुलाई बाहिर निस्कन उक्स्याउँदै खुल्लमखुल्ला फिल्म हेर्न जान समेत आग्रह गरे ।
जसको परिणाम आज अमेरिकाले भोग्नु परेको छ र न्यूयोर्क अमेरिकामा कोरोनाको केन्द्र बनेको छ ।
यही एक महिनाको अवधिमा न्यूयोर्कमा मात्र कोरोनाका संक्रमितको संख्या २० हजार नाघिसकेको छ भने अहिलेसम्म २८० जना भन्दा बढीको ज्यान गइसकेको छ ।
न्यूयोर्कमा कोरोनाको संक्रमण बढ्नुमा मेयर ब्लासियो र राष्ट्रपति डोनाल्ड ट्रम्पको लापरवाहीयुक्त अभिव्यक्ति प्रमुख कारक रहेको चर्चा सुरुभएको छ भने उनीहरुको व्यापक आलोचना सुरुभएको छ ।
उनीहरुको असावधानी र लापरवाहीका कारण आज अमेरिका एक लाख भन्दा कोरोना संक्रमित सहित कोरोनाको इपिसेन्टर बनेको छ भने मृतकको संख्या पनि दिन प्रतिदिन बढ्दै गएको छ ।
